ਜਲੰਧਰ/ਪਠਾਨਕੋਟ। ਪੰਜਾਬ ਦੀ ਪਵਿੱਤਰ ਧਰਤੀ ‘ਤੇ ਚੱਲ ਰਹੇ ਰਾਮਲੀਲਾ ਮੰਚਨ ਨੂੰ ਸ਼ਰਮਸਾਰ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਪਠਾਨਕੋਟ ਜ਼ਿਲ੍ਹੇ ਦੇ ਸੁਜਾਨਪੁਰ ਇਲਾਕੇ ਦੇ ਪਿੰਡ ਅਜੀਜ਼ਪੁਰ ਵਿੱਚ ਭਗਵਾਨ ਰਾਮ ਅਤੇ ਸੀਤਾ ਜੀ ਦੇ ਕਿਰਦਾਰ ਨਿਭਾ ਰਹੇ ਕਲਾਕਾਰਾਂ ਦੇ ਸਾਹਮਣੇ ਹੀ ਸ਼ੂਰਪਨਖਾ ਦਾ ਕਿਰਦਾਰ ਨਿਭਾਅ ਰਹੇ ਕਲਾਕਾਰ ਨੇ ਕਿਸੇ ਬਾਲੀਵੁੱਡ ਆਈਟਮ ਸੌਂਗ ਦੀ ਤਰ੍ਹਾਂ ਭੱਦਾ ਅਤੇ ਅਸ਼ਲੀਲ ਡਾਂਸ ਕਰਕੇ ਸਾਰੀਆਂ ਧਾਰਮਿਕ ਮਰਿਆਦਾਵਾਂ ਤੋੜ ਦਿੱਤੀਆਂ।
ਇਸ ਘਟਨਾ ਦਾ ਵੀਡੀਓ ਵਾਇਰਲ ਹੁੰਦੇ ਹੀ ਹਿੰਦੂ ਸੰਗਠਨਾਂ ਵਿੱਚ ਗੁੱਸੇ ਦੀ ਲਹਿਰ ਦੌੜ ਗਈ।
ਹਿੰਦੂ ਸੰਗਠਨਾਂ ਦਾ ਵੱਡਾ ਐਕਸ਼ਨ, ਥਾਣੇ ਪਹੁੰਚੀ ਸ਼ਿਕਾਇਤ
ਸ਼ਿਵ ਸੈਨਾ ਲਾਇਨ ਦੇ ਪੰਜਾਬ ਪ੍ਰਧਾਨ ਬਿੱਕਰੀ ਵਰਮਾ ਦੀ ਅਗਵਾਈ ਹੇਠ ਹਿੰਦੂ ਸੰਗਠਨ ਤੁਰੰਤ ਐਕਸ਼ਨ ਵਿੱਚ ਆਏ। ਉਨ੍ਹਾਂ ਨੇ ਰਾਮਲੀਲਾ ਮੰਚ ਦੀ ਮਰਿਆਦਾ ਭੰਗ ਕਰਨ ਦੇ ਦੋਸ਼ ਹੇਠ ਸੁਜਾਨਪੁਰ ਥਾਣੇ ਵਿੱਚ ਕਮੇਟੀ ਖ਼ਿਲਾਫ਼ ਸਖ਼ਤ ਸ਼ਿਕਾਇਤ ਦਰਜ ਕਰਵਾਈ।
ਸੰਗਠਨਾਂ ਨੇ ਦੋਸ਼ੀਆਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਦੀ ਮੰਗ ਕੀਤੀ ਹੈ।
ਲਗਾਤਾਰ ਵਧਦੇ ਦਬਾਅ ਕਾਰਨ, ਅਜੀਜ਼ਪੁਰ ਦੀ ਰਾਮਲੀਲਾ ਕਮੇਟੀ ਨੂੰ ਅੰਤ ਵਿੱਚ ਹੱਥ ਜੋੜ ਕੇ ਮੁਆਫ਼ੀ ਮੰਗਣੀ ਪਈ ਅਤੇ ਭਰੋਸਾ ਦੇਣਾ ਪਿਆ ਕਿ ਅੱਗੇ ਤੋਂ ਅਜਿਹੀ ਗਲਤੀ ਬਿਲਕੁਲ ਨਹੀਂ ਹੋਵੇਗੀ।
ਕਮੇਟੀ ਦਾ ਬਚਾਅ: “40 ਸਾਲਾਂ ‘ਚ ਪਹਿਲੀ ਗਲਤੀ”
ਕਮੇਟੀ ਦੇ ਮੈਂਬਰਾਂ ਨੇ ਸਫਾਈ ਦਿੰਦੇ ਹੋਏ ਕਿਹਾ ਕਿ ਉਨ੍ਹਾਂ ਦੀ ਰਾਮਲੀਲਾ 40 ਸਾਲਾਂ ਤੋਂ ਚੱਲ ਰਹੀ ਹੈ ਅਤੇ ਪਹਿਲੀ ਵਾਰ ਅਜਿਹਾ ਹੋਇਆ ਹੈ। ਇਹ ਡਾਂਸ ਲਕਸ਼ਮਣ-ਸ਼ੂਰਪਨਖਾ ਸੰਵਾਦ ਦੌਰਾਨ ਕੀਤਾ ਗਿਆ, ਜਿਸ ਤੋਂ ਬਾਅਦ ਲਕਸ਼ਮਣ ਦਾ ਰੋਲ ਕਰਨ ਵਾਲਾ ਕਲਾਕਾਰ ਵੀ ਮੰਚ ਤੋਂ ਪਿੱਛੇ ਹਟ ਗਿਆ ਸੀ।
ਜ਼ਿਕਰਯੋਗ ਹੈ ਕਿ ਇਸ ਤੋਂ ਇੱਕ ਦਿਨ ਪਹਿਲਾਂ ਕਪੂਰਥਲਾ ਵਿੱਚ ਵੀ ਇਸ ਤਰ੍ਹਾਂ ਦੇ ਡੀਜੇ ‘ਤੇ ਡਾਂਸ ਦੀ ਵੀਡੀਓ ਸਾਹਮਣੇ ਆ ਚੁੱਕੀ ਹੈ, ਜਿਸ ਤੋਂ ਬਾਅਦ ਪੰਜਾਬ ਵਿੱਚ ਰਾਮਲੀਲਾ ਦੇ ਮੰਚਨ ਦੇ ਤਰੀਕਿਆਂ ‘ਤੇ ਗੰਭੀਰ ਸਵਾਲ ਖੜ੍ਹੇ ਹੋ ਗਏ ਹਨ।
