ਫਤਿਹਗੜ੍ਹ ਚੂੜੀਆਂ ਤੋਂ ਇੱਕ ਕਿਲੋਮੀਟਰ ਦੂਰ ਪਿੰਡ ਬੱਦੋਵਾਲ ਕਲਾਂ ਵਿੱਚ ਕਬਰਸਤਾਨ ਦੇ ਬਿਲਕੁਲ ਨੇੜੇ ਬਣੀ ਹੱਡਾਰੋੜੀ ਕਾਰਨ ਪਹਿਲਾਂ ਹੀ ਪ੍ਰੇਸ਼ਾਨ ਪਿੰਡ ਵਾਸੀਆਂ ਦਾ ਗੁੱਸਾ ਉਸ ਸਮੇਂ ਫੁੱਟ ਪਿਆ ਜਦੋਂ BDPO ਸੁਖਜਿੰਦਰ ਸਿੰਘ ਅਤੇ ਮਹਿਲਾ ਸਰਪੰਚ ਅਮਨਦੀਪ ਕੌਰ ਵੱਲੋਂ ਕਬਰਸਤਾਨ ਵਿੱਚ ਕੂੜਾ ਡੰਪ ਬਣਾਉਣ ਦਾ ਕੰਮ ਸ਼ੁਰੂ ਕੀਤਾ ਗਿਆ। ਪਿੰਡ ਦੇ ਮਸੀਹ ਭਾਈਚਾਰੇ ਨੇ ਇੱਕੱਠੇ ਹੋ ਕੇ ਇਸ ਦਾ ਤਗੜਾ ਵਿਰੋਧ ਕੀਤਾ ਅਤੇ ਸਰਪੰਚ ਤੇ BDPO ਵਿਰੁੱਧ ਜ਼ਬਰਦਸਤ ਨਾਰੇਬਾਜ਼ੀ ਕੀਤੀ।
ਮੌਕੇ ਦੀ ਤਣਾਅਪੂਰਨ ਹਾਲਤ ਦੇ ਚਲਦੇ ਐਸ.ਐਚ.ਓ ਸੁਰਿੰਦਰ ਪਾਲ ਸਿੰਘ ਪੁਲਿਸ ਮੁਲਾਜ਼ਮਾਂ ਸਮੇਤ ਤੁਰੰਤ ਪਹੁੰਚੇ ਅਤੇ ਸਥਿਤੀ ‘ਤੇ ਨਿਯੰਤਰਣ ਬਣਾਇਆ।
ਪਿੰਡ ਵਾਸੀਆਂ ਦਾ ਰੋਸ — “ਕਬਰਸਤਾਨ ਸਾਡੇ ਪੁਰਖਿਆਂ ਤੋਂ ਹੈ, ਹੁਣ ਮਰੇਆਂ ਨੂੰ ਕਿੱਥੇ ਦਫਨਾਈਏ?”
ਮਸੀਹ ਭਾਈਚਾਰੇ ਦੇ ਸ਼ਿੰਦਰਪਾਲ, ਜਗਦੀਸ਼ ਮਸੀਹ, ਸੁਰਿੰਦਰ ਮਸੀਹ, ਅਕਾਸ਼ ਮਸੀਹ, ਰਿੰਕੂ, ਵਿੱਕੀ, ਮੰਗਾ ਮਸੀਹ ਸਮੇਤ ਕਈਆਂ ਨੇ ਸਰਪੰਚ ਅਮਨਦੀਪ ਕੌਰ ਵਿਰੁੱਧ ਗੰਭੀਰ ਦੋਸ਼ ਲਗਾਏ। ਲੋਕਾਂ ਨੇ ਕਿਹਾ ਕਿ ਇਹ ਜਗ੍ਹਾ ਉਹਨਾਂ ਦੇ ਦਾਦੇ–ਪਰਦਾਦਿਆਂ ਦੇ ਸਮੇਂ ਤੋਂ ਕਬਰਸਤਾਨ ਵਜੋਂ ਵਰਤੀ ਜਾ ਰਹੀ ਹੈ ਅਤੇ ਇੱਥੇ ਹੀ ਉਹ ਆਪਣੇ ਮ੍ਰਿਤਕਾਂ ਨੂੰ ਦਫਨਾਉਂਦੇ ਆ ਰਹੇ ਹਨ।
ਉਹਨਾਂ ਨੇ ਦੋਸ਼ ਲਗਾਇਆ ਕਿ ਹੱਡਾਰੋੜੀ ਨੂੰ ਪਿੰਡ ਤੋਂ ਦੂਰ ਸਿਫ਼ਟ ਕਰਨ ਦੀ ਬਜਾਏ, ਸਰਪੰਚ ਨੇ ਇੱਥੇ ਕੂੜਾ ਡੰਪ ਬਣਾਏ ਜਾਣ ਦੀ ਸ਼ੁਰੂਆਤ ਕਰ ਦਿੱਤੀ ਹੈ, ਜਿਸ ਨਾਲ ਬਦਬੂ, ਗੰਦਗੀ ਅਤੇ ਬੀਮਾਰੀਆਂ ਦਾ ਖ਼ਤਰਾ ਹੋਰ ਵੱਧ ਗਿਆ ਹੈ। ਪਿੰਡ ਵਾਸੀਆਂ ਨੇ ਮੰਗ ਕੀਤੀ ਕਿ ਹੱਡਾਰੋੜੀ ਅਤੇ ਕੂੜਾ ਡੰਪ ਨੂੰ ਰੇਲਵੇ ਲਾਈਨ ਨੇੜੇ ਦੂਰਲੇ ਇਲਾਕੇ ਵਿੱਚ ਸਿਫ਼ਟ ਕੀਤਾ ਜਾਵੇ।
ਸਰਕਾਰੀ ਅਧਿਕਾਰੀਆਂ ‘ਤੇ ਵੀ ਇਲਜ਼ਾਮ
ਪਿੰਡ ਵਾਸੀਆਂ ਨੇ ਇਹ ਵੀ ਆਰੋਪ ਲਗਾਇਆ ਕਿ ਨਰੇਗਾ ਵਿੱਚ ਉਹਨਾਂ ਤੋਂ ਸਸਤੇ ਰੇਟ ‘ਤੇ ਮਿਹਨਤ ਕਰਵਾਈ ਜਾਂਦੀ ਹੈ, ਪਰ ਕਾਗਜ਼ਾਂ ‘ਚ ਕਿਸੇ ਹੋਰ ਦੇ ਨਾਮ ਦਿਖਾਏ ਜਾਂਦੇ ਹਨ। ਉਹਨਾਂ ਨੇ DC ਗੁਰਦਾਸਪੁਰ ਅਤੇ ਹੋਰ ਉੱਚ ਅਧਿਕਾਰੀਆਂ ਤੋਂ ਨਿਰਪੱਖ ਜਾਂਚ ਅਤੇ ਜ਼ਰੂਰੀ ਕਾਰਵਾਈ ਦੀ ਮੰਗ ਕੀਤੀ।
BDPO ਸੁਖਜਿੰਦਰ ਸਿੰਘ ਨੇ ਦੋਸ਼ ਨਕਾਰਦੇ
BDPO ਸੁਖਜਿੰਦਰ ਸਿੰਘ ਨੇ ਸਾਰੇ ਦੋਸ਼ਾਂ ਨੂੰ ਰੱਦ ਕਰਦਿਆਂ ਸਪਸ਼ਟ ਕੀਤਾ ਕਿ ਸਰਕਾਰ ਦੀ Solid Waste Scheme ਦੇ ਤਹਿਤ ਪਿੰਡ ਵਿੱਚ ਕੂੜੇ ਦੇ ਵਿਗਿਆਨਕ ਪ੍ਰਬੰਧ ਲਈ ਇਹ ਪ੍ਰੋਜੈਕਟ 6 ਮਹੀਨੇ ਪਹਿਲਾਂ ਸ਼ੁਰੂ ਕੀਤਾ ਗਿਆ ਸੀ। ਅੱਜ ਟੀਨਾ ਪਾਉਣ ਸਮੇਂ ਹੀ ਕੁਝ ਲੋਕ ਅਚਾਨਕ ਵਿਰੋਧ ਲਈ ਸਾਹਮਣੇ ਆਏ।
ਉਨ੍ਹਾਂ ਕਿਹਾ ਕਿ ਕੰਮ ਸਰਕਾਰੀ ਹੈ, ਇਸ ਲਈ ਅਣਚਾਹੀ ਘਟਨਾ ਰੋਕਣ ਲਈ ਪੁਲਿਸ ਦੀ ਮਦਦ ਲੈਣੀ ਪਈ।
ਸਰਪੰਚ ਅਮਨਦੀਪ ਕੌਰ ਦਾ ਮਤਲਬ — “ਕੁਝ ਲੋਕ ਜਾਨਬੁੱਝ ਕੇ ਰਾਜਨੀਤੀ ਕਰ ਰਹੇ ਹਨ”
ਪਿੰਡ ਦੀ AAP ਸਰਪੰਚ ਅਮਨਦੀਪ ਕੌਰ ਨੇ ਸਪਸ਼ਟ ਕੀਤਾ ਕਿ ਉਹ ਤਾਂ ਇਸ ਥਾਂ ਦੀ ਚਾਰਦੀਵਾਰੀ ਕਰ ਰਹੇ ਹਨ ਤਾਂ ਜੋ ਹੱਡਾਰੋੜੀ ਅਤੇ ਕੂੜਾ ਇੱਕ ਥਾਂ ਸੰਭਾਲਿਆ ਜਾ ਸਕੇ, ਪਰ ਕੁਝ ਲੋਕ ਜਾਣਬੁੱਝ ਕੇ ਰਾਜਨੀਤਿਕ ਵਿਰੋਧ ਕਰ ਰਹੇ ਹਨ।
ਪੁਲਿਸ ਮੌਕੇ ‘ਤੇ ਤਾਇਨਾਤ
ਐਸ.ਐਚ.ਓ ਸੁਰਿੰਦਰ ਪਾਲ ਸਿੰਘ ਪੁਲਿਸ ਪਾਰਟੀ ਸਮੇਤ ਮੌਕੇ ‘ਤੇ ਡਟੇ ਰਹੇ ਤਾਂ ਜੋ ਮਾਹੌਲ ਸ਼ਾਂਤ ਰਿਹਾ ਤੇ ਕੋਈ ਗਲਤ ਘਟਨਾ ਨਾ ਹੋਵੇ।
ਘਟਨਾ ਦੀ ਜਾਂਚ ਜਾਰੀ ਹੈ ਅਤੇ ਪਿੰਡ ਵਾਸੀਆਂ ਦੀਆਂ ਮੰਗਾਂ ਉੱਪਰਲਾ ਪ੍ਰਸ਼ਾਸਨ ਤਕ ਪਹੁੰਚਾਈਆਂ ਜਾ ਰਹੀਆਂ ਹਨ।
