ਸੈਂਟਰਲ ਜੇਲ੍ਹ ‘ਚੋਂ ਹਵਾਲਾਤੀ ਫਰਾਰ — ਸੁਰੱਖਿਆ ਪ੍ਰਬੰਧਾਂ ‘ਤੇ ਵੱਡੇ ਸਵਾਲ!
ਲੁਧਿਆਣਾ ਦੇ ਤਾਜਪੁਰ ਰੋਡ ‘ਤੇ ਸਥਿਤ ਸੈਂਟਰਲ ਜੇਲ੍ਹ ‘ਚੋਂ ਬੀਤੀ ਰਾਤ ਇੱਕ ਹਵਾਲਾਤੀ ਦੇ ਫਰਾਰ ਹੋ ਜਾਣ ਨਾਲ ਜੇਲ੍ਹ ਪ੍ਰਸ਼ਾਸਨ ਵਿੱਚ ਹੜਕੰਪ ਮਚ ਗਿਆ ਹੈ। ਫਰਾਰ ਹਵਾਲਾਤੀ ਦੀ ਪਛਾਣ ਰਾਹੁਲ ਪੁੱਤਰ ਵਿਨੋਦ ਸ਼ਾਹ ਵਜੋਂ ਹੋਈ ਹੈ, ਜੋ ਅਸਲ ‘ਚ ਗਾਜ਼ੀਆਬਾਦ (ਯੂ.ਪੀ.) ਦਾ ਰਹਿਣ ਵਾਲਾ ਹੈ ਤੇ ਇਸ ਸਮੇਂ ਲੁਧਿਆਣਾ ਦੇ ਸੁੰਦਰ ਨਗਰ ਭਾਮੀਆਂ ਕਲਾਂ ‘ਚ ਵਸਦਾ ਸੀ।
ਪਤਾ ਲੱਗਾ ਹੈ ਕਿ 25 ਜਨਵਰੀ 2024 ਨੂੰ ਜਮਾਲਪੁਰ ਥਾਣੇ ‘ਚ ਉਸਦੇ ਖ਼ਿਲਾਫ਼ ਛੀਨਾ-ਝਪਟੀ ਦਾ ਮਾਮਲਾ ਦਰਜ ਹੋਇਆ ਸੀ ਅਤੇ ਉਸਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।
ਹੈਰਾਨੀ ਦੀ ਗੱਲ ਇਹ ਹੈ ਕਿ 16 ਅਪ੍ਰੈਲ 2024 ਨੂੰ ਜਦੋਂ ਪੁਲਿਸ ਉਸਨੂੰ ਸਰਕਾਰੀ ਬੱਸ ਰਾਹੀਂ ਅਦਾਲਤ ‘ਚ ਪੇਸ਼ ਕਰਨ ਲਈ ਲੈ ਗਈ ਸੀ, ਤਦੋਂ ਵੀ ਇਹ ਮੁਲਜ਼ਮ ਪੁਲਿਸ ਨੂੰ ਚਕਮਾ ਦੇ ਕੇ ਕੋਰਟ ਤੋਂ ਭੱਜ ਗਿਆ ਸੀ! ਉਸ ਸਮੇਂ ਵੀ ਥਾਣਾ ਡਿਵੀਜ਼ਨ ਨੰਬਰ 5 ਵਿੱਚ ਇਸਦੀ ਫਰਾਰੀ ਦਾ ਕੇਸ ਦਰਜ ਕੀਤਾ ਗਿਆ ਸੀ।
ਫਿਲਹਾਲ ਰਾਹੁਲ ਜੇਲ੍ਹ ਵਿੱਚ ਓਹੀ ਮਾਮਲੇ ‘ਚ ਬੰਦ ਸੀ, ਪਰ ਬੀਤੀ ਰਾਤ ਅਚਾਨਕ ਉਹ ਜੇਲ੍ਹ ‘ਚੋਂ ਗਾਇਬ ਹੋ ਗਿਆ। ਜਦੋਂ ਇਹ ਗੱਲ ਸਾਹਮਣੇ ਆਈ ਤਾਂ ਜੇਲ੍ਹ ਪ੍ਰਬੰਧਨ ਦੇ ਹੱਥ-ਪੈਰ ਫੁੱਲ ਗਏ ਅਤੇ ਪੂਰੇ ਜੇਲ੍ਹ ਕੰਪਲੈਕਸ ‘ਚ ਸਨਸਨੀ ਫੈਲ ਗਈ।
ਸੁਰੱਖਿਆ ਪ੍ਰਬੰਧਾਂ ‘ਤੇ ਸਵਾਲ ਖੜ੍ਹੇ
ਇਸ ਗੰਭੀਰ ਲਾਪਰਵਾਹੀ ਨੇ ਜੇਲ੍ਹ ਪ੍ਰਸ਼ਾਸਨ ਦੀ ਕਾਰਗੁਜ਼ਾਰੀ ‘ਤੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਕਈ ਘੰਟਿਆਂ ਤੱਕ ਕਿਸੇ ਨੂੰ ਪਤਾ ਹੀ ਨਹੀਂ ਲੱਗਿਆ ਕਿ ਹਵਾਲਾਤੀ ਕਿਵੇਂ ਤੇ ਕਦੋਂ ਗਾਇਬ ਹੋ ਗਿਆ।
ਇਸ ਸਮੇਂ ਪੁਲਿਸ ਵੱਲੋਂ ਸ਼ਹਿਰ ਦੇ ਕਈ ਹਿੱਸਿਆਂ ‘ਚ ਵਿਸ਼ੇਸ਼ ਸੁਰਾਗਰਸੀ ਤੇ ਤਲਾਸ਼ੀ ਅਭਿਆਨ ਸ਼ੁਰੂ ਕੀਤਾ ਗਿਆ ਹੈ। ਹਾਲਾਂਕਿ ਜਦੋਂ ਮੀਡੀਆ ਵੱਲੋਂ ਜੇਲ੍ਹ ਅਧੀਕਾਰੀ ਤੇ ਸੂਪਰਿਟੈਂਡੈਂਟ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਤਾਂ ਉਨ੍ਹਾਂ ਦੇ ਫ਼ੋਨ ਨਹੀਂ ਉੱਠੇ।
ਹੁਣ ਤੱਕ ਇਸ ਘਟਨਾ ਬਾਰੇ ਕੋਈ ਅਧਿਕਾਰਿਕ ਬਿਆਨ ਨਹੀਂ ਆਇਆ, ਪਰ ਸੁਰੱਖਿਆ ਪ੍ਰਬੰਧਾਂ ਦੀ ਇਹ ਵੱਡੀ ਚੂਕ ਲੁਧਿਆਣਾ ਸੈਂਟਰਲ ਜੇਲ੍ਹ ਦੀ ਪ੍ਰਬੰਧਕੀ ਸਿਸਟਮ ‘ਤੇ ਵੱਡਾ ਦਾਗ਼ ਛੱਡ ਗਈ ਹੈ।
ਫਰਾਰ ਹਵਾਲਾਤੀ ਦੀ ਤਲਾਸ਼ ਜ਼ੋਰਾਂ ‘ਤੇ — ਪੁਲਿਸ ਤੇ ਇੰਟੈਲੀਜੈਂਸ ਵਿਭਾਗ ਚੌਕਸੀ ‘ਤੇ।
