ਸਿਵਲ ਹਸਪਤਾਲ ‘ਚ ਦਿਲ ਦਹਿਲਾ ਦੇਣ ਵਾਲਾ ਮੰਜ਼ਰ: ਮਰੀਜ਼ ਜ਼ਮੀਨ ‘ਤੇ ਪਏ ਤੜਫ਼ਦੇ, ਬੈੱਡਾਂ ‘ਤੇ ਗੰਦਗੀ ਤੇ ਬਦਬੂ – ਸਰਕਾਰ ਦੇ ਸਾਰੇ ਦਾਅਵੇ ਫੇਲ!
ਜਲੰਧਰ (ਪੰਕਜ ਸੋਨੀ) :– ਪੰਜਾਬ ਸਰਕਾਰ ਭਾਵੇਂ ਹਰ ਮੰਚ ‘ਤੇ ਇਹ ਦਾਅਵਾ ਕਰਦੀ ਰਹਿੰਦੀ ਹੈ ਕਿ ਗਰੀਬਾਂ ਨੂੰ ਸਰਕਾਰੀ ਹਸਪਤਾਲਾਂ ਵਿੱਚ ਇਲਾਜ ਲਈ ਪੂਰੀਆਂ ਸਹੂਲਤਾਂ ਮੁਹੱਈਆ ਕਰਵਾਈਆਂ ਜਾ ਰਹੀਆਂ ਹਨ, ਪਰ ਜਲੰਧਰ ਸਿਵਲ ਹਸਪਤਾਲ ਦੀਆਂ ਤਾਜ਼ਾ ਤਸਵੀਰਾਂ ਨੇ ਸਰਕਾਰ ਦੇ ਇਹ ਸਾਰੇ ਦਾਅਵੇਆਂ ਦੀ ਧੱਜੀਆਂ ਉਡਾ ਦਿੱਤੀਆਂ ਹਨ।
ਸਾਡੀ ਟੀਮ ਅੱਜ ਜਦੋਂ ਸਿਵਲ ਹਸਪਤਾਲ ਦੀ ਦੂਜੀ ਮੰਜ਼ਿਲ ‘ਤੇ ਸਥਿਤ ਸਰਜੀਕਲ ਵਾਰਡ ਵਿੱਚ ਪਹੁੰਚੀ, ਤਾਂ ਜੋ ਦ੍ਰਿਸ਼ ਸਾਹਮਣੇ ਆਏ, ਉਹ ਰੂਹ ਕੰਬਾ ਦੇਣ ਵਾਲੇ ਸਨ। ਬੈੱਡ ਦੀ ਬਜਾਏ ਮਰੀਜ਼ ਜ਼ਮੀਨ ‘ਤੇ ਪਏ ਸਨ, ਬੈੱਡਾਂ ‘ਤੇ ਗੰਦਗੀ, ਚਾਦਰਾਂ ਬਦਲੀਆਂ ਬਿਨਾਂ ਕਈ–ਕਈ ਦਿਨਾਂ ਤੋਂ ਪਈਆਂ ਸਨ ਅਤੇ ਪੂਰੇ ਵਾਰਡ ‘ਚੋਂ ਬਦਬੂ ਫੈਲ ਰਹੀ ਸੀ।
ਮਰੀਜ਼ਾਂ ਦੀ ਹਾਲਤ – “ਨਰਕ ਵਰਗੀ ਜ਼ਿੰਦਗੀ”
ਬੈੱਡ ਨੰਬਰ 29 ‘ਤੇ 21 ਜੂਨ 2025 ਨੂੰ ਦਾਖ਼ਲ ਕਰਵਾਏ ਗਏ ਇੱਕ ਅਣਪਛਾਤੇ ਮਰੀਜ਼ ਦੀ ਹਾਲਤ ਦੇਖ ਕੇ ਕਿਸੇ ਦਾ ਵੀ ਦਿਲ ਕੰਬ ਜਾਵੇ। ਉਹ ਮਰੀਜ਼ ਆਪਣੇ ਬੈੱਡ ‘ਤੇ ਨਹੀਂ, ਸਗੋਂ ਨੰਗੀ ਜ਼ਮੀਨ ‘ਤੇ ਪਿਆ ਸੀ। ਬੈੱਡ ਦੀ ਗੰਦਗੀ ਅਤੇ ਉਸਦੇ ਆਲੇ–ਦੁਆਲੇ ਦਾ ਮਾਹੌਲ ਕਿਸੇ ਇਨਸਾਨ ਲਈ ਨਹੀਂ, ਸਗੋਂ ਜਾਨਵਰਾਂ ਲਈ ਵੀ ਕਬੂਲਯੋਗ ਨਹੀਂ ਸੀ।
ਇਸੇ ਤਰ੍ਹਾਂ ਬੈੱਡ ਨੰਬਰ 34 ‘ਤੇ 4 ਸਤੰਬਰ 2025 ਨੂੰ ਦਾਖ਼ਲ ਹੋਇਆ ਹੋਰ ਮਰੀਜ਼ ਵੀ ਜ਼ਮੀਨ ‘ਤੇ ਹੀ ਪਿਆ ਮਿਲਿਆ। ਉਸਦੀ ਹਾਲਤ ਵੀ ਪਹਿਲੇ ਮਰੀਜ਼ ਤੋਂ ਵੱਖਰੀ ਨਹੀਂ ਸੀ।
ਹੋਰ ਮਰੀਜ਼ਾਂ ਦੇ ਖੁਲਾਸੇ
ਵਾਰਡ ਵਿੱਚ ਮੌਜੂਦ ਹੋਰ ਮਰੀਜ਼ਾਂ ਨਾਲ ਗੱਲਬਾਤ ਕਰਨ ‘ਤੇ ਉਹਨਾਂ ਨੇ ਖੁਲਾਸਾ ਕੀਤਾ ਕਿ ਸਰਕਾਰੀ ਹਸਪਤਾਲ ਵੱਲੋਂ ਸਿਰਫ਼ ਖਾਣਾ ਹੀ ਦਿੱਤਾ ਜਾਂਦਾ ਹੈ। ਨਾ ਤਾਂ ਚਾਦਰਾਂ ਬਦਲੀਆਂ ਜਾਂਦੀਆਂ ਹਨ, ਨਾ ਹੀ ਸਾਫ਼–ਸਫ਼ਾਈ ਹੁੰਦੀ ਹੈ ਅਤੇ ਨਾ ਹੀ ਮਰੀਜ਼ਾਂ ਦੀ ਢੰਗ ਨਾਲ ਦੇਖਭਾਲ ਕੀਤੀ ਜਾਂਦੀ ਹੈ।
ਸਿਹਤ ਮੰਤਰੀ ਚੁੱਪ – ਕੋਈ ਜਵਾਬ ਨਹੀਂ
ਜਦੋਂ ਇਸ ਮਾਮਲੇ ਬਾਰੇ ਪੰਜਾਬ ਦੇ ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਤਾਂ ਉਨ੍ਹਾਂ ਵੱਲੋਂ ਨਾ ਹੀ ਫ਼ੋਨ ਚੁੱਕਿਆ ਗਿਆ ਅਤੇ ਨਾ ਹੀ ਕੋਈ ਜਵਾਬ ਦਿੱਤਾ ਗਿਆ। ਇਸ ਚੁੱਪ ਨੇ ਸਵਾਲਾਂ ਨੂੰ ਹੋਰ ਵੀ ਗਹਿਰਾ ਕਰ ਦਿੱਤਾ ਹੈ।
ਵੱਡਾ ਸਵਾਲ – ਕੀ ਇਹੀ ਹੈ “ਸਰਕਾਰੀ ਸਿਹਤ ਪ੍ਰਣਾਲੀ”?
ਇਹ ਸਾਰਾ ਮਾਮਲਾ ਨਾ ਸਿਰਫ਼ ਪੰਜਾਬ ਸਰਕਾਰ ਦੇ ਦਾਅਵਿਆਂ ‘ਤੇ ਵੱਡਾ ਪ੍ਰਸ਼ਨ ਚਿੰਨ੍ਹ ਲਗਾਉਂਦਾ ਹੈ, ਸਗੋਂ ਇਹ ਵੀ ਸਾਬਤ ਕਰਦਾ ਹੈ ਕਿ ਗਰੀਬ ਮਰੀਜ਼ਾਂ ਨੂੰ ਇਨਸਾਨੀ ਹਾਲਤਾਂ ਤੋਂ ਵੀ ਬਦਤਰ ਜੀਵਨ ਜੀਣਾ ਪੈ ਰਿਹਾ ਹੈ। ਜਿੱਥੇ ਸਰਕਾਰ ਕਾਗਜ਼ਾਂ ‘ਤੇ “ਹਰ ਸਹੂਲਤ” ਮੁਹੱਈਆ ਹੋਣ ਦਾ ਦਾਅਵਾ ਕਰਦੀ ਹੈ, ਉੱਥੇ ਹਕੀਕਤ ਇਹ ਹੈ ਕਿ ਮਰੀਜ਼ ਬੈੱਡਾਂ ਦੀ ਬਜਾਏ ਜ਼ਮੀਨ ‘ਤੇ ਪਏ ਤੜਫ਼ ਰਹੇ ਹਨ।
ਇਹ ਖ਼ਬਰ ਆਪਣੇ–ਆਪ ਵਿੱਚ ਇੱਕ “ਸਨਸਨੀਖੇਜ਼ ਖੁਲਾਸਾ” ਹੈ, ਜੋ ਸਰਕਾਰ ਅਤੇ ਸਿਹਤ ਵਿਭਾਗ ਦੀ ਕਾਰਗੁਜ਼ਾਰੀ ‘ਤੇ ਵੱਡੇ ਸਵਾਲ ਖੜ੍ਹੇ ਕਰਦੀ ਹੈ।
