ਰਿਆਜ਼: ਸਾਊਦੀ ਅਰਬ ਵਿੱਚ ਇੱਕ ਸ਼ਖ਼ਸ ਨੇ ਐਸਾ ਕੰਮ ਕੀਤਾ ਹੈ ਜਿਸ ਨਾਲ ਸ਼ਾਹ ਸਲਮਾਨ ਬਿਨ ਅਬਦੁਲ ਅਜ਼ੀਜ਼ ਦਾ ਦਿਲ ਜਿੱਤ ਲਿਆ ਹੈ। ਸਾਊਦੀ ਕਿੰਗ ਨੇ ਹੁਣ ਇਸ ਸ਼ਖ਼ਸ ਨੂੰ ਜ਼ਿੰਦਗੀ ਬਦਲ ਦੇਣ ਵਾਲਾ ਇਨਾਮ ਦਿੱਤਾ ਹੈ। ਇਸ ਸ਼ਖ਼ਸ ਨੂੰ 10 ਲੱਖ ਸਾਊਦੀ ਰਿਆਲ (ਲਗਭਗ 2.23 ਕਰੋੜ ਭਾਰਤੀ ਰੁਪਏ) ਨਕਦ ਇਨਾਮ ਦੇਣ ਦਾ ਐਲਾਨ ਕੀਤਾ ਗਿਆ ਹੈ।
ਸਾਊਦੀ ਪ੍ਰੈਸ ਏਜੰਸੀ ਨੇ ਦੱਸਿਆ ਹੈ ਕਿ ਮਾਹਿਰ ਫਹਦ ਅਲ-ਦਲਬਾਹੀ ਨੇ ਆਪਣੀ ਜਾਨ ਜੋਖਮ ਵਿੱਚ ਪਾ ਕੇ ਇੱਕ ਸੜਦੇ ਟਰੱਕ ਨੂੰ ਪੈਟਰੋਲ ਪੰਪ ਤੋਂ ਦੂਰ ਪਹੁੰਚਾਇਆ, ਜਿਸ ਕਰਕੇ ਵੱਡਾ ਹਾਦਸਾ ਟਲ ਗਿਆ। ਮਾਹਿਰ ਦੀ ਬਹਾਦਰੀ ਕਾਰਨ ਰਿਆਜ਼ ਦੇ ਪੱਛਮ ਵਿੱਚ ਸਥਿਤ ਇੱਕ ਛੋਟੇ ਕਸਬੇ ਵਿੱਚ ਦਰਜਨਾਂ ਲੋਕਾਂ ਦੀ ਜਾਨ ਬਚ ਗਈ।
ਸੜਦੇ ਟਰੱਕ ਵਿੱਚ ਚੜ੍ਹ ਗਿਆ ਅਲ-ਦਲਬਾਹੀ
ਰਿਪੋਰਟ ਦੇ ਮੁਤਾਬਕ, 40 ਸਾਲਾ ਅਲ-ਦਲਬਾਹੀ ਪਿਛਲੇ ਸ਼ੁੱਕਰਵਾਰ ਨੂੰ ਰਿਆਜ਼ ਤੋਂ ਲਗਭਗ 300 ਕਿਲੋਮੀਟਰ ਦੂਰ ਆਪਣੇ ਪਿੰਡ ਅਲ-ਸਲੀਹੀਆ ਜਾ ਰਿਹਾ ਸੀ। ਇਸ ਦੌਰਾਨ ਉਸਨੇ ਪਸ਼ੂਆਂ ਦੇ ਚਾਰੇ ਨਾਲ ਭਰਿਆ ਇੱਕ ਟਰੱਕ ਸੜਦਾ ਹੋਇਆ ਵੇਖਿਆ। ਅੱਗ ਵਧਦੀ ਦੇਖ ਕੇ ਟਰੱਕ ਚਾਲਕ ਨੇ ਟਰੱਕ ਪੈਟਰੋਲ ਪੰਪ ਕੋਲ ਹੀ ਛੱਡ ਦਿੱਤਾ। ਇਹ ਵੇਖ ਕੇ ਅਲ-ਦਲਬਾਹੀ ਨੇ ਜਾਨ ਦੀ ਪਰਵਾਹ ਨਾ ਕਰਦਿਆਂ ਟਰੱਕ ਦੇ ਅੰਦਰ ਚੜ੍ਹ ਕੇ ਉਸਨੂੰ ਪੈਟਰੋਲ ਪੰਪ ਤੋਂ ਦੂਰ ਇੱਕ ਖੁੱਲ੍ਹੀ ਜਗ੍ਹਾ ‘ਚ ਲੈ ਗਿਆ।
