Tariff War ਵਿਚਕਾਰ Trump ਦਾ ਵੱਡਾ ਫੈਸਲਾ, Sargio Gor ਹੋਣਗੇ ਭਾਰਤ ਵਿਚ ਅਮਰੀਕਾ ਦੇ ਨਵੇਂ ਰਾਜਦੂਤ
ਸਟਾਰ ਚੀਜ਼ ਨੈੱਟਵਰਕ (ਬਯੂਰੋ) : ਭਾਰਤ ਅਤੇ ਅਮਰੀਕਾ ਵਿਚ ਚੱਲ ਰਹੇ ਟੈਰੀਫ਼ ਵਾਰ ਦੇ ਦਰਮਿਆਨ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵੱਡਾ ਕਦਮ ਚੁੱਕਦੇ ਹੋਏ ਸੇਰਜਿਓ ਗੋਰ ਨੂੰ ਭਾਰਤ ਵਿਚ ਅਮਰੀਕਾ ਦਾ ਅਗਲਾ ਰਾਜਦੂਤ ਨਿਯੁਕਤ ਕੀਤਾ ਹੈ। ਇਸ ਨਾਲ ਹੀ ਗੋਰ ਨੂੰ ਦੱਖਣੀ ਅਤੇ ਮੱਧ ਏਸ਼ੀਆਈ ਮਾਮਲਿਆਂ ਲਈ ਵਿਸ਼ੇਸ਼ ਦੂਤ ਦੀ ਜ਼ਿੰਮੇਵਾਰੀ ਵੀ ਦਿੱਤੀ ਗਈ ਹੈ।
ਟਰੰਪ ਨੇ ਇਹ ਐਲਾਨ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ਟ੍ਰੁਥ ਸੋਸ਼ਲ ‘ਤੇ ਕਰਦਿਆਂ ਲਿਖਿਆ
“ਮੈਨੂੰ ਖੁਸ਼ੀ ਹੈ ਕਿ ਮੈਂ ਸੇਰਜਿਓ ਗੋਰ ਨੂੰ ਭਾਰਤ ਵਿੱਚ ਅਮਰੀਕੀ ਰਾਜਦੂਤ ਅਤੇ ਦੱਖਣੀ ਤੇ ਮੱਧ ਏਸ਼ੀਆਈ ਮਾਮਲਿਆਂ ਦਾ ਵਿਸ਼ੇਸ਼ ਦੂਤ ਨਿਯੁਕਤ ਕਰ ਰਿਹਾ ਹਾਂ। ਸੇਰਜਿਓ ਅਤੇ ਉਸ ਦੀ ਟੀਮ ਨੇ ਰਿਕਾਰਡ ਸਮੇਂ ਵਿੱਚ 4,000 ਤੋਂ ਵੱਧ America First Patriots ਦੀ ਨਿਯੁਕਤੀ ਕਰ ਸਾਡਾ ਏਜੰਡਾ ਅੱਗੇ ਵਧਾਇਆ ਹੈ। ਉਹ ਅਮਰੀਕਾ ਨੂੰ ਮੁੜ ਮਹਾਨ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਉਣਗੇ।”
Trump ਦੇ ਭਰੋਸੇਮੰਦ ਸਾਥੀ ਹਨ ਗੋਰ
ਸੇਰਜਿਓ ਗੋਰ ਕਾਫ਼ੀ ਸਮੇਂ ਤੋਂ ਟਰੰਪ ਪਰਿਵਾਰ ਦੇ ਨੇੜਲੇ ਸਹਿਯੋਗੀ ਰਹੇ ਹਨ। ਉਨ੍ਹਾਂ ਨੇ ਡੋਨਾਲਡ ਟਰੰਪ ਜੂਨੀਅਰ ਨਾਲ ਮਿਲ ਕੇ Winning Team Publishing ਦੀ ਸਥਾਪਨਾ ਕੀਤੀ ਸੀ, ਜਿਸ ਤਹਿਤ ਰਾਸ਼ਟਰਪਤੀ ਟਰੰਪ ਦੀਆਂ ਦੋ ਕਿਤਾਬਾਂ ਪ੍ਰਕਾਸ਼ਿਤ ਹੋਈਆਂ। ਇਸ ਤੋਂ ਇਲਾਵਾ ਉਹ ਟਰੰਪ ਦੇ ਚੋਣ ਅਭਿਆਨਾਂ ਨੂੰ ਸਮਰਥਨ ਦੇਣ ਵਾਲੇ ਸਭ ਤੋਂ ਵੱਡੇ Super PACs ਵਿੱਚੋਂ ਇੱਕ ਚਲਾ ਚੁੱਕੇ ਹਨ। ਟਰੰਪ ਨੇ ਗੋਰ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ –
“ਸੇਰਜਿਓ ਇੱਕ ਬਿਹਤਰੀਨ ਦੋਸਤ ਅਤੇ ਸਾਥੀ ਹਨ, ਜੋ ਚੋਣੀ ਅਭਿਆਨ ਤੋਂ ਲੈ ਕੇ ਪ੍ਰਕਾਸ਼ਨ ਤੱਕ ਹਰ ਮੋਰਚੇ ‘ਤੇ ਮੇਰੇ ਨਾਲ ਖੜ੍ਹੇ ਰਹੇ ਹਨ। ਉਹ ਭਾਰਤ ਵਰਗੇ ਮਹੱਤਵਪੂਰਨ ਦੇਸ਼ ਲਈ ਸ਼ਾਨਦਾਰ ਰਾਜਦੂਤ ਸਾਬਤ ਹੋਣਗੇ।”
Sargio Gor ਦੀ ਪ੍ਰਤੀਕ੍ਰਿਆ
ਭਾਰਤ ਲਈ ਰਾਜਦੂਤ ਨਿਯੁਕਤ ਹੋਣ ‘ਤੇ ਸੇਰਜਿਓ ਗੋਰ ਨੇ X ‘ਤੇ ਲਿਖਿਆ –
“ਅਮਰੀਕਾ ਦਾ ਭਾਰਤ ਵਿੱਚ ਪ੍ਰਤਿਨਿਧਿਤਵ ਕਰਨਾ ਮੇਰੀ ਜ਼ਿੰਦਗੀ ਦਾ ਸਭ ਤੋਂ ਵੱਡਾ ਸਨਮਾਨ ਹੋਵੇਗਾ। ਰਾਸ਼ਟਰਪਤੀ ਟਰੰਪ ਦੇ ਭਰੋਸੇ ਲਈ ਮੈਂ ਆਭਾਰੀ ਹਾਂ। ਇਹ ਮੇਰੇ ਕਰੀਅਰ ਦਾ ਇਤਿਹਾਸਕ ਪਲ ਹੈ।”
ਟਰੰਪ ਪ੍ਰਸ਼ਾਸਨ ਵਿੱਚ ਅਹਿਮ ਭੂਮਿਕਾ
ਗੋਰ ਨੇ ਟਰੰਪ ਪ੍ਰਸ਼ਾਸਨ ਵਿੱਚ ਸੀਨੀਅਰ ਅਧਿਕਾਰੀਆਂ ਦੀ ਨਿਯੁਕਤੀ ਦੀ ਪ੍ਰਕਿਰਿਆ ਵਿੱਚ ਵੱਡੀ ਭੂਮਿਕਾ ਨਿਭਾਈ। ਹਾਲ ਹੀ ਵਿੱਚ ਉਹ ਨਾਸਾ ਦੇ ਮੁਖੀ ਲਈ ਅਰਬਪਤੀ ਜੈਰਡ ਆਇਜ਼ੈਕਮੈਨ ਦੇ ਨਾਮਜ਼ਦਗੀ ਪ੍ਰਕਿਰਿਆ ਵਿੱਚ ਵੀ ਸ਼ਾਮਲ ਰਹੇ। ਉਨ੍ਹਾਂ ਨੂੰ ਇੱਕ ਅਜਿਹੇ ਰਣਨੀਤਿਕਾਰ ਵਜੋਂ ਜਾਣਿਆ ਜਾਂਦਾ ਹੈ, ਜਿਨ੍ਹਾਂ ਨੇ ਪ੍ਰਸ਼ਾਸਨਕ ਢਾਂਚੇ ਨੂੰ ਟਰੰਪ ਦੇ ਵਿਜ਼ਨ ਦੇ ਅਨੁਸਾਰ ਢਾਲਣ ਵਿੱਚ ਯੋਗਦਾਨ ਪਾਇਆ।
ਮੌਜੂਦਾ ਹਾਲਾਤ
ਸੇਰਜਿਓ ਗੋਰ ਭਾਰਤ ਵਿੱਚ ਐਰਿਕ ਗਾਰਸੇਟੀ ਦੇ ਉੱਤਰਾਧਿਕਾਰੀ ਹੋਣਗੇ। ਗਾਰਸੇਟੀ ਨੇ 11 ਮਈ 2023 ਤੋਂ 20 ਜਨਵਰੀ 2025 ਤੱਕ ਅਮਰੀਕੀ ਰਾਜਦੂਤ ਵਜੋਂ ਸੇਵਾ ਨਿਭਾਈ। ਉਨ੍ਹਾਂ ਦੇ ਕਾਰਜਕਾਲ ਦੇ ਸਮਾਪਤ ਹੋਣ ਤੋਂ ਬਾਅਦ ਦੂਤਾਵਾਸ ਦੀ ਕਮਾਨ ਅਸਥਾਈ ਤੌਰ ‘ਤੇ ਜੌਰਗਨ ਕੇ. ਐਂਡਰਿਊਜ਼ ਨੇ ਸੰਭਾਲੀ। ਹੁਣ ਗੋਰ ਦੀ ਨਿਯੁਕਤੀ ਨੂੰ ਅਮਰੀਕੀ ਸੀਨੇਟ ਤੋਂ ਮਨਜ਼ੂਰੀ ਮਿਲਣੀ ਬਾਕੀ ਹੈ। ਤਦ ਤੱਕ ਉਹ ਵ੍ਹਾਈਟ ਹਾਊਸ ਵਿੱਚ ਆਪਣੀ ਮੌਜੂਦਾ ਜ਼ਿੰਮੇਵਾਰੀ ਨਿਭਾਉਂਦੇ ਰਹਿਣਗੇ।
