ਬਸਤੀ ਬਾਵਾ ਖੇਲ ਦੇ ਰਾਜ ਨਗਰ ਨੇੜੇ ਸ਼ਰਾਬ ਤਸਕਰ ਦੇ ਘਰ ਪੁਲਿਸ ਦੀ ਰੇਡ, 18 ਵਿਅਕਤੀਆਂ ਸਮੇਤ ਮਹਿਲਾ ਖ਼ਿਲਾਫ਼ ਮਾਮਲਾ ਦਰਜ
ਜਲੰਧਰ: (ਹਨੀ ਸਿੰਘ/ਪੰਕਜ ਸੋਨੀ) :- ਬਸਤੀ ਬਾਵਾ ਖੇਲ ਥਾਣਾ ਖੇਤਰ ਅਧੀਨ ਆਉਂਦੇ ਰਾਜ ਨਗਰ ਦੇ ਨੇੜੇ ਨਹਿਰ ਕੋਲ ਪੁਲਿਸ ਵੱਲੋਂ ਕਥਿਤ ਸ਼ਰਾਬ ਤਸਕਰੀ ਦੇ ਮਾਮਲੇ ਵਿੱਚ ਛਾਪੇਮਾਰੀ ਕੀਤੀ ਗਈ। ਇਹ ਕਾਰਵਾਈ 29 ਤਾਰੀਖ ਦੀ ਰਾਤ ਨੂੰ ਕਥਿਤ ਸ਼ਰਾਬ ਤਸਕਰ ਤਰਸੇਮ ਲਾਲ ਦੇ ਘਰ ਕੀਤੀ ਗਈ।
ਜਾਣਕਾਰੀ ਅਨੁਸਾਰ ਰੇਡ ਦੌਰਾਨ ਪੁਲਿਸ ਨੂੰ ਸਕੌਚ ਵਿਸਕੀ ਦੀਆਂ ਕਈ ਬੋਤਲਾਂ ਬਰਾਮਦ ਹੋਈਆਂ। ਪੁਲਿਸ ਦਾ ਦਾਅਵਾ ਹੈ ਕਿ ਜਦੋਂ ਟੀਮ ਵੱਲੋਂ ਕਾਰਵਾਈ ਕੀਤੀ ਜਾ ਰਹੀ ਸੀ ਤਾਂ ਮੌਕੇ ‘ਤੇ ਮੌਜੂਦ 18 ਵਿਅਕਤੀਆਂ ਨੇ ਕਥਿਤ ਤੌਰ ‘ਤੇ ਤਰਸੇਮ ਲਾਲ ਨੂੰ ਮੌਕੇ ਤੋਂ ਫਰਾਰ ਹੋਣ ਵਿੱਚ ਮਦਦ ਕੀਤੀ।
ਇਸ ਮਾਮਲੇ ਵਿੱਚ ਪੁਲਿਸ ਵੱਲੋਂ 18 ਵਿਅਕਤੀਆਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਤਰਸੇਮ ਲਾਲ ਦੀ ਪਤਨੀ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ।
ਪੁਲਿਸ ਵੱਲੋਂ ਮਾਮਲੇ ਦੀ ਅਗਲੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਫਰਾਰ ਦੱਸੇ ਜਾ ਰਹੇ ਤਰਸੇਮ ਲਾਲ ਦੀ ਭਾਲ ਜਾਰੀ ਹੈ।
