ਪਟਿਆਲਾ (ਸੁੱਖ ਸੰਧੂ) ਖੇਡ ਦੇ ਮੈਦਾਨਾਂ ਵਿੱਚ ਪੰਜਾਬੀਆਂ ਨੇ ਹਮੇਸ਼ਾ ਹੀ ਝੰਡੇ ਗੱਡੇ ਹਨ ਅਤੇ ਅੱਗੇ ਵੀ ਖੇਡ ਦੇ ਮੈਦਾਨਾਂ ਵਿੱਚ ਅੱਗੇ ਵੱਧ ਰਹੇ ਹਨ। ਇਸੇ ਤਰ੍ਹਾਂ ਪਟਿਆਲਾ ਦੇ ਰਹਿਣ ਵਾਲੇ ਤੇਜਪ੍ਰੀਤ ਸਿੰਘ ਕ੍ਰਿਕਟ ਦੀ ਦੁਨੀਆ ਵਿੱਚ ਲਗਾਤਾਰ ਆਪਣੀ ਛਾਪ ਛੱਡਦੇ ਜਾ ਰਹੇ ਹਨ। ਬੀਤੇਂ ਦਿਨੀਂ ਰਾਜਕੋਟ ‘ਚ ਸੰਪੰਨ ਹੋਏ ਵੈੈਸਟ ਜ਼ੋਨ ਇੰਟਰ ਯੂਨੀਵਰਸਿਟੀ ਟੂਰਨਾਮੈਂਟ ਦੇ ਵਿੱਚ ਤੇਜਪ੍ਰੀਤ ਸਿੰਘ ਨੇ ਆਲ ਇੰਡੀਆ ਬੈਸਟ ਬਾਲਰ ਦਾ ਖਿਤਾਬ ਜਿੱਤਿਆ ਹੈ।
ਤੇਜਪ੍ਰੀਤ ਜਿਸ ਦੇ ਵੱਡੇ ਭਰਾ ਅਨਮੋਲ ਪ੍ਰੀਤ ਅਤੇ ਪ੍ਰਭ ਸਿਮਰਨ ਸਿੰਘ ਪਹਿਲਾ ਤੋਂ ਹੀ ਪੰਜਾਬ ਦਾ ਨਾਮ ਰੋਸ਼ਨ ਕਰ ਰਹੇ ਹਾਂ ਹੁਣ ਤੇਜਪ੍ਰੀਤ ਵੀ ਉਹਨਾਂ ਦੇ ਨਕਸ਼ੇ ਕਦਮ ‘ਤੇ ਚੱਲਦਾ ਹੋਇਆ ਪੰਜਾਬ ਦਾ ਨਾਮ ਰੌਸ਼ਨ ਕਰ ਰਿਹਾ ਹੈ। ਤੁਹਾਨੂੰ ਦੱਸ ਦਈਏ ਕਿ ਪ੍ਰਭ ਸਿਮਰਨ ਸਿੰਘ ਜੋ ਕਿ ਆਈਪੀਐੱਲ ਦੇ ਵਿੱਚ ਪੰਜਾਬ ਕਿੰਗਸ ਦੀ ਟੀਮ ਵੱਲੋਂ ਖੇਲ ਰਹੇ ਹਨ ਅਤੇ ਉਹਨਾਂ ਦੇ ਭਰਾ ਅਨਮੋਲ ਪ੍ਰੀਤ ਸਿੰਘ ਵੀ ਆਈਪੀਐੱਲ ਦੇ ਵਿੱਚ ਨਾਮਨਾ ਖੱਟ ਚੁੱਕੇ ਹਨ।
ਤੇਜਪ੍ਰੀਤ ਸਿੰਘ ਨੂੰ ਆਲ ਇੰਡੀਆ ਬੈਸਟ ਬਾਲਰ ਚੁਣਨ ਤੋਂ ਬਾਅਦ ਪਟਿਆਲਾ ਸਥਿਤ ਉਹਨਾਂ ਦੇ ਪਿਤਾ ਸਤਵਿੰਦਰ ਪਾਲ ਸਿੰਘ ਨੇ ਦੱਸਿਆ ਕਿ ਪਹਿਲਾਂ ਤੋਂ ਹੀ ਉਹਨਾਂ ਦੇ ਦੋ ਪੁੱਤਰ ਕ੍ਰਿਕਟ ਦੇ ਵਿੱਚ ਆਪਣਾ ਨਾਮ ਬਣਾ ਰਹੇ ਹਨ ਅਤੇ ਹੁਣ ਤੇਜਪ੍ਰੀਤ ਵੀ ਆਪਣਾ ਯੋਗਦਾਨ ਦਿੰਦੇ ਹੋਏ ਉਹਨਾਂ ਦੇ ਸੁਪਨਿਆਂ ਨੂੰ ਸਕਾਰ ਕਰ ਰਹੇ ਹਨ।
ਉਹਨਾਂ ਦੱਸਿਆ ਕਿ ਅਨਮੋਲ ਪ੍ਰੀਤ ਸਿੰਘ ਅਤੇ ਪ੍ਰਭ ਸਿਮਰਨ ਤਾਂ ਪਹਿਲਾਂ ਤੋਂ ਹੀ ਆਪਣੀ ਛਾਪ ਛੱਡ ਚੁੱਕੇ ਹਨ ਹੁਣ ਉਹਨਾਂ ਦਾ ਤੀਜਾ ਪੁੱਤਰ ਤੇਜਪ੍ਰੀਤ ਵੀ ਉਹਨਾਂ ਦਾ ਨਾਮ ਰੋਸ਼ਨ ਕਰ ਰਿਹਾ ਹੈ।
