ਨੇੜਲੇ ਪਿੰਡ ਬੁਰਜਮੁਹਾਰ ਵਿੱਚ ਅੱਜ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ, ਜਿੱਥੇ ਕਰੀਬ 27 ਸਾਲਾ ਨੌਜਵਾਨ ਕੁਸ਼ਲਦੀਪ ਨੇ ਮਾਨਸਿਕ ਤਣਾਅ ਕਾਰਨ ਆਪਣੇ ਘਰ ਵਿੱਚ ਫਾਹਾ ਲੈ ਕੇ ਜੀਵਨ ਲੀਲਾ ਸਮਾਪਤ ਕਰ ਲਈ। ਮ੍ਰਿਤਕ ਦੋ ਮਾਸੂਮ ਬੱਚਿਆਂ—ਇੱਕ ਪੁੱਤਰ ਅਤੇ ਇੱਕ ਧੀ—ਦਾ ਪਿਤਾ ਸੀ।
ਕੁਸ਼ਲਦੀਪ ਦੇ ਪਰਿਵਾਰ ਅਨੁਸਾਰ ਉਹ ਮੂਲ ਰੂਪ ਵਿੱਚ ਹਰਿਆਣਾ ਦੇ ਹਿਸਾਰ ਦੇ ਰਹਿਣ ਵਾਲੇ ਹਨ ਅਤੇ ਤਿੰਨ ਸਾਲ ਪਹਿਲਾਂ ਬੁਰਜਮੁਹਾਰ ਵਿੱਚ ਆ ਕਰ ਵੱਸੇ ਸਨ, ਜਿੱਥੇ ਉਹਨਾਂ ਨੇ ਜ਼ਮੀਨ ਖਰੀਦ ਕੇ ਖੇਤੀਬਾੜੀ ਸ਼ੁਰੂ ਕੀਤੀ ਸੀ।
ਦੱਸਿਆ ਗਿਆ ਹੈ ਕਿ ਕੁਸ਼ਲਦੀਪ ਦੇ ਪਿਤਾ ਨੂੰ ਲਗਭਗ ਇੱਕ ਸਾਲ ਪਹਿਲਾਂ ਬ੍ਰੇਨ ਹੈਮਰੇਜ ਹੋਇਆ ਸੀ, ਜਿਸ ਤੋਂ ਬਾਅਦ ਉਹ ਬਿਮਾਰੀ ਨਾਲ ਗੰਭੀਰ ਰੂਪ ਵਿੱਚ ਜੂਝ ਰਹੇ ਹਨ। ਪਿਤਾ ਦੀ ਲੰਬੀ ਬਿਮਾਰੀ ਅਤੇ ਘਰੇਲੂ ਤਣਾਅ ਕਾਰਨ ਕੁਸ਼ਲਦੀਪ ਕਾਫ਼ੀ ਸਮੇਂ ਤੋਂ ਮਾਨਸਿਕ ਪਰੇਸ਼ਾਨੀ ਵਿੱਚ ਸੀ।
ਅੱਜ ਦੁਪਹਿਰ ਜਦੋਂ ਪਰਿਵਾਰ ਦੇ ਸਾਰੇ ਮੈਂਬਰ ਵਿਹੜੇ ਵਿੱਚ ਸਨ, ਕੁਸ਼ਲਦੀਪ ਨੇ ਕਮਰੇ ਵਿਚ ਜਾ ਕੇ ਫਾਹਾ ਲੈ ਲਿਆ। ਪਰਿਵਾਰ ਨੇ ਜਦੋਂ ਉਸਨੂੰ ਲਟਕਦਾ ਦੇਖਿਆ ਤਾਂ ਤੁਰੰਤ ਹੇਠਾਂ ਉਤਾਰਿਆ ਪਰ ਉਸਦੀ ਮੌਤ ਹੋ ਚੁੱਕੀ ਸੀ।
ਘਟਨਾ ਦੀ ਸੂਚਨਾ ਮਿਲਦੇ ਹੀ ਸਦਰ ਪੁਲਿਸ ਮੌਕੇ ’ਤੇ ਪਹੁੰਚੀ। ਸਹਾਇਕ ਸਬ-ਇੰਸਪੈਕਟਰ ਗੁਰਮੀਤ ਸਿੰਘ ਨੇ ਪਰਿਵਾਰ ਦੇ ਬਿਆਨ ਦਰਜ ਕਰ ਕੇ ਲਾਜ਼ਮੀ ਕਾਰਵਾਈ ਕੀਤੀ। ਪੋਸਟਮਾਰਟਮ ਦੇ ਬਾਅਦ ਲਾਸ਼ ਪਰਿਵਾਰ ਨੂੰ ਸੌਂਪ ਦਿੱਤੀ ਗਈ। ਪਿੰਡ ਵਿੱਚ ਮਾਹੌਲ ਸੋਗਵਾਨ ਹੈ।
