ਅੰਤਿਮ ਸੰਸਕਾਰ ਲਈ ਲੱਕੜੀ ਨੂੰ ਲੈ ਕੇ ਵਿਵਾਦ, ਦੋ ਧਿਰਾਂ ਵਿੱਚ ਝੜਪ — ਇੱਕੋ ਪਰਿਵਾਰ ਦੇ 8 ਜ਼ਖ਼ਮੀ
ਹਰਿਆਣਾ ਦੇ ਨੂੰਹ ਜ਼ਿਲ੍ਹੇ ਦੇ ਬਿਸ਼ਸਰ ਅਕਬਰਪੁਰ ਪਿੰਡ ਵਿੱਚ ਅੰਤਿਮ ਸੰਸਕਾਰ ਲਈ ਲੱਕੜੀ ਇਕੱਠੀ ਕਰਨ ਨੂੰ ਲੈ ਕੇ ਦੋ ਧਿਰਾਂ ਵਿਚਕਾਰ ਤਗੜੀ ਝੜਪ ਹੋ ਗਈ। ਇਸ ਟਕਰਾਅ ਵਿੱਚ ਇੱਕੋ ਪਰਿਵਾਰ ਦੇ ਅੱਠ ਮੈਂਬਰ ਗੰਭੀਰ ਤੌਰ ’ਤੇ ਜ਼ਖ਼ਮੀ ਹੋ ਗਏ। ਪੁਲਿਸ ਮੁਤਾਬਕ ਝਗੜੇ ਦੌਰਾਨ ਲੱਠੀਆਂ-ਡੰਡਿਆਂ ਦੇ ਨਾਲ ਗੋਲੀਆਂ ਵੀ ਚੱਲੀਆਂ।
ਸ਼ਿਕਾਇਤਕਰਤਾ ਰਾਜਾ ਨੇ ਦੱਸਿਆ ਕਿ ਉਸਦੇ ਰਿਸ਼ਤੇਦਾਰ ਧਰੰਬੀਰ ਦੇ ਦਿਹਾਂਤ ਤੋਂ ਬਾਅਦ ਉਹ ਆਪਣੇ ਭਰਾ ਉਡਲ ਅਤੇ ਪੁੱਤਰ ਦੀਪਾਂਸ਼ੂ ਨਾਲ ਚਿਤਾ ਲਈ ਲੱਕੜੀਆਂ ਲੈਣ ਪੰਚਾਇਤ ਦੀ ਜ਼ਮੀਨ ’ਤੇ ਗਿਆ ਸੀ। ਇਸ ਦੌਰਾਨ ਵਿਰੋਧੀ ਧਿਰ ਦੇ ਲਗਭਗ ਨੌ ਜਣੇ ਮੋਟਰਸਾਈਕਲ, ਸਕੂਟਰ ਅਤੇ ਕਾਰਾਂ ’ਚ ਆਏ। ਉਹਨਾਂ ਕੋਲ ਕਥਿਤ ਤੌਰ ’ਤੇ ਬੰਦੂਕਾਂ, ਚਾਕੂ, ਡੰਡੇ ਅਤੇ ਲੋਹੇ ਦੀਆਂ ਰਾਡਾਂ ਸਨ।
ਆਰੋਪ ਹੈ ਕਿ ਉਹਨਾਂ ਨੇ ਕਿਹਾ ਕਿ ਇਹ ਜ਼ਮੀਨ ਉਹਨਾਂ ਦੀ ਹੈ ਅਤੇ ਇੱਥੋਂ ਕਿਸੇ ਨੂੰ ਵੀ ਲੱਕੜੀ ਨਹੀਂ ਲੈਣ ਦੇਣਗੇ। ਬਹਿਸ ਵਧੀ ਤਾਂ ਦੋਵੇਂ ਪਾਸਿਆਂ ਵਿੱਚ ਮਾਰਪੀਟ ਸ਼ੁਰੂ ਹੋ ਗਈ। ਸਤਬੀਰ ਨੇ ਉਡਲ ਦੇ ਸਿਰ ’ਤੇ ਡੰਡੇ ਨਾਲ ਵਾਰ ਕੀਤਾ। ਉਡਲ ਨੂੰ ਬਚਾਉਣ ਆਏ ਉਸਦੇ ਭਤੀਜੇ ਰੋਹਿਤ ’ਤੇ ਰਾਮਦੇਵ ਨੇ ਗੋਲੀ ਚਲਾ ਦਿੱਤੀ, ਜਿਸ ਨਾਲ ਉਹ ਜ਼ਖ਼ਮੀ ਹੋ ਗਿਆ। ਸੋਨੂ ਨੂੰ ਵੀ ਗੋਲੀ ਲੱਗੀ। ਨਵੀਨ ਨੇ ਅਭਿਸ਼ੇਕ ਦੇ ਕੰਨ ’ਤੇ ਚਾਕੂ ਨਾਲ ਵਾਰ ਕਰ ਦਿੱਤਾ।
ਜਦੋਂ ਪਿੰਡ ਵਾਸੀ ਇਕੱਠੇ ਹੋਏ ਤਾਂ ਸਾਰੇ ਦੋਸ਼ੀ ਮੌਕੇ ਤੋਂ ਫ਼ਰਾਰ ਹੋ ਗਏ। ਪੁਲਿਸ ਨੇ 10 ਨਾਂਜ਼ਦ ਆਰੋਪੀਆਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
