ਮੱਧ ਪ੍ਰਦੇਸ਼ ਦੇ ਨਰਸਿੰਘਪੁਰ ਜ਼ਿਲ੍ਹੇ ਤੋਂ ਬੇਹੱਦ ਹੈਰਾਨ ਕਰ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਓਸਵਾਲ (ਬਚਛਾਵਤ) ਪਰਿਵਾਰ ਦੀ ਧੀ ਅਨਾਮਿਕਾ ਓਸਵਾਲ ਆਪਣੀ ਕਰੋੜਾਂ ਦੀ ਜਾਇਦਾਦ ਛੱਡ ਕੇ ਸੰਨਿਆਸ ਲੈਣ ਜਾ ਰਹੀ ਹੈ। ਉਹ ਇਕੱਲੀ ਨਹੀਂ ਹੈ, ਉਨ੍ਹਾਂ ਦੇ ਪਤੀ, ਡਾਕਟਰ ਧੀ ਅਤੇ ਸੀਏ ਪੁੱਤ ਨੇ ਵੀ ਅਧਿਆਤਮਿਕ ਮਾਰਗ ਚੁਣ ਲਿਆ ਹੈ। ਇਸ ਖ਼ਬਰ ਨੂੰ ਸੁਣ ਹਰ ਕੋਈ ਹੈਰਾਨ ਹੈ।
ਅਨਾਮਿਕਾ ਓਸਵਾਲ, ਸਵ. ਟੀਕਮਚੰਦ ਓਸਵਾਲ ਅਤੇ ਕਮਲਾਬਾਈ ਓਸਵਾਲ ਦੀ ਧੀ ਹੈ। ਉਨ੍ਹਾਂ ਦੇ ਪਰਿਵਾਰ ‘ਚ ਇਕ ਧੀ ਨੇ 2022 ‘ਚ ਦੀਕਸ਼ਾ ਲੈ ਕੇ ‘ਸਾਧਵੀ ਸ਼ਾਸਵਤ ਨਿਧੀ’ ਨਾਂ ਨਾਲ ਆਤਮ ਸਾਧਨਾ ਦਾ ਮਾਰਗ ਅਪਣਾਇਆ ਹੈ। ਹੁਣ ਅਨਾਮਿਕਾ ਆਪਣੇ ਪਤੀ ਦਿਨੇਸ਼, ਧੀ ਹਰਸ਼ਿਤਾ ਅਤੇ ਬੇਟੇ ਵਿਧਾਨ ਨਾਲ ਸੰਨਿਆਸ ਧਾਰਨ ਕਰ ਰਹੀ ਹੈ। ਪਰਿਵਾਰ ਕੋਲ ਕਰੀਬ 5 ਕਰੋੜ ਤੋਂ ਵੱਧ ਦੀ ਚੱਲ-ਅਚੱਲ ਜਾਇਦਾਦ ਹੈ, ਜਿਸ ਨੂੰ ਛੱਡ ਕੇ ਉਹ ਆਤਮਸਾਧਨਾ ‘ਚ ਲੀਨ ਹੋਣਗੇ।
9 ਨਵੰਬਰ ਨੂੰ ਦੀਕਾਸ਼ਰਥੀ ਅਭਿਨੰਦਨ ਸਮਾਰੋਹ ਆਯੋਜਿਤ ਕੀਤਾ ਜਾਵੇਗਾ, ਜਿੱਥੇ ਇਹ ਪੂਰਾ ਪਰਿਵਾਰ ਸੰਨਿਆਸ ਦੇ ਮਾਰਗ ‘ਤੇ ਤੁਰ ਪਵੇਗਾ। ਉਹ ਆਚਾਰੀਆ ਜਿਨ ਪੀਊਸ਼ ਸਾਗਰ ਤੋਂ ਜੈਨ ਦੀਕਸ਼ਾ ਗ੍ਰਹਿਣ ਕਰਨਗੇ। ਸਕਲ ਜੈਨ ਸ਼ਵੇਤਾਂਬਰ ਸੰਘ ਵਲੋਂ ਇਹ ਪ੍ਰੋਗਰਾਮ ਸ਼੍ਰੀ ਮੁਨਿਸੁਬ੍ਰਤ ਸਵਾਮੀ ਜੈਨ ਸ਼ੇਵਤਾਂਬਰ ਮੰਦਰ, ਗੁਦਰੀ ਬਜ਼ਾਰ ‘ਚ ਆਯੋਜਿਤ ਹੋਵੇਗਾ। ਇਸ ਤੋਂ ਪਹਿਲਾਂ ਮੇਨ ਰੋਡ ਤੋਂ ਬਾਹਰੀ ਰੋਡ ਤੱਕ ਦੀਕਸ਼ਾਰਥੀ ਪਰਿਵਾਰ ਦਾ ਵਰਘੋੜਾ ਕੱਢਿਆ ਜਾਵੇਗਾ।
