ਜਲੰਧਰ (ਪੰਕਜ ਸੋਨੀ):- ਜਲੰਧਰ ਪਬਲਿਕ ਰਿਲੇਸ਼ਨ ਦਫ਼ਤਰ ‘ਚ ਪੱਤਰਕਾਰਾਂ ਨੂੰ ਜਾਰੀ ਕੀਤੇ ਜਾਣ ਵਾਲੇ ਯੈਲੋ ਕਾਰਡ (ਪੱਤਰਕਾਰ ਪਛਾਣ ਪੱਤਰ) ਨੂੰ ਲੈ ਕੇ ਵੱਡਾ ਖੁਲਾਸਾ ਸਾਹਮਣੇ ਆਇਆ ਹੈ। ਜਾਣਕਾਰੀ ਅਨੁਸਾਰ, ਇੱਕੋ ਨਾਮ ਅਤੇ ਇੱਕੋ ਹੀ ਵੈੱਬ ਪੋਰਟਲ ਨਾਲ ਜੁੜੇ ਵਿਅਕਤੀ ਦੇ ਦੋ ਵੱਖ-ਵੱਖ ਯੈਲੋ ਕਾਰਡ ਜਾਰੀ ਕੀਤੇ ਗਏ ਹਨ, ਜਿਨ੍ਹਾਂ ਦੇ ਸੀਰੀਅਲ ਨੰਬਰ 254 ਅਤੇ 256 ਹਨ।
ਇਹ ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਪੱਤਰਕਾਰ ਭਾਈਚਾਰੇ ‘ਚ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ। ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ —
ਜਦੋਂ ਹਰ ਕਾਰਡ ਲਈ ਵੱਖਰੀ ਅਰਜ਼ੀ ਤੇ ਵੈਰੀਫਿਕੇਸ਼ਨ ਪ੍ਰਕਿਰਿਆ ਹੁੰਦੀ ਹੈ,
ਤਾਂ ਫਿਰ ਇੱਕੋ ਨਾਮ ਤੇ ਦੋ ਕਾਰਡ ਕਿਵੇਂ ਜਾਰੀ ਹੋ ਗਏ?
ਇਸ ਮਾਮਲੇ ਦੀ ਪੁਸ਼ਟੀ ਲਈ ਜਦੋਂ RTI ਰਾਹੀਂ ਜਾਣਕਾਰੀ ਮੰਗੀ ਗਈ, ਤਾਂ ਹੋਰ ਹੈਰਾਨੀਜਨਕ ਤੱਥ ਸਾਹਮਣੇ ਆਏ ਹਨ। ਦੋਹਾਂ ਕਾਰਡਾਂ ‘ਤੇ ਨਾਮ, ਪੋਰਟਲ ਅਤੇ ਵੇਰਵੇ ਇਕੋ ਜਿਹੇ ਹਨ, ਜਿਸ ਨਾਲ ਸ਼ੱਕ ਹੋਰ ਗਹਿਰਾ ਗਿਆ ਹੈ ਕਿ ਇਹ ਸਿਸਟਮ ਦੀ ਗਲਤੀ ਹੈ ਜਾਂ ਦਫ਼ਤਰ ਦੇ ਅੰਦਰ ਕੋਈ ਮਿਲੀਭੁਗਤ?
ਜਾਣਕਾਰੀ ਅਨੁਸਾਰ, RTI ਵਿੱਚ ਖੁਲਾਸਾ ਹੋਇਆ ਹੈ ਕਿ ਦੋਹਾਂ ਕਾਰਡ ਵੱਖ-ਵੱਖ ਤਾਰੀਖਾਂ ‘ਚ ਤਿਆਰ ਕੀਤੇ ਗਏ, ਪਰ ਦੋਹਾਂ ‘ਤੇ ਸਾਇਨ ਕਰਨ ਵਾਲਾ ਅਧਿਕਾਰੀ ਵੀ ਇਕੋ ਹੀ ਸੀ। ਇਸ ਨਾਲ ਹੁਣ ਇਹ ਮਾਮਲਾ ਫਰਜ਼ੀਵਾਢੇ ਅਤੇ ਦਫ਼ਤਰੀ ਲਾਪਰਵਾਹੀ ਦੇ ਖ਼ਤਰੇ ਵੱਲ ਇਸ਼ਾਰਾ ਕਰਦਾ ਹੈ।
ਪੱਤਰਕਾਰ ਭਾਈਚਾਰਾ ਹੁਣ ਮੰਗ ਕਰ ਰਿਹਾ ਹੈ ਕਿ ਪੂਰੇ ਮਾਮਲੇ ਦੀ ਇਨਕੁਆਇਰੀ ਕੀਤੀ ਜਾਵੇ ਅਤੇ ਇਹ ਪਤਾ ਲਗਾਇਆ ਜਾਵੇ ਕਿ ਕਿਹੜੇ ਅਧਿਕਾਰੀ ਦੀ ਲਾਪਰਵਾਹੀ ਜਾਂ ਜਾਣ-ਬੁੱਝ ਕੇ ਕੀਤੇ ਗਏ ਕਦਮ ਨਾਲ ਇਹ ਗੜਬੜ ਹੋਈ।
ਹੁਣ ਵੱਡਾ ਸਵਾਲ:
ਕੀ ਇਹ ਸਿਰਫ਼ ਸਿਸਟਮ ਦੀ ਗਲਤੀ ਸੀ ਜਾਂ ਦਫ਼ਤਰ ਦੇ ਅੰਦਰੋਂ ਕੋਈ “ਖਾਸ ਖੇਡ”?
ਜੇ ਇਕੋ ਪੋਰਟਲ ਤੇ ਇਕੋ ਨਾਮ ਵਾਲੇ ਵਿਅਕਤੀ ਨੂੰ ਦੋ ਕਾਰਡ ਮਿਲ ਸਕਦੇ ਹਨ,
ਤਾਂ ਫਿਰ ਸਿਸਟਮ ਵਿੱਚ ਹੋਰ ਕਿੰਨੀ ਗਲਤੀਆਂ ਹੋ ਸਕਦੀਆਂ ਹਨ?
ਹੁਣ ਮਾਮਲੇ ਦੀ ਜਾਂਚ ਦੀ ਮੰਗ:
ਸੋਸ਼ਲ ਮੀਡੀਆ ‘ਤੇ ਵੀ ਇਹ ਮਾਮਲਾ ਗਰਮਾਇਆ ਹੋਇਆ ਹੈ, ਜਿੱਥੇ ਕਈ ਲੋਕਾਂ ਨੇ ਟਿੱਪਣੀ ਕੀਤੀ ਹੈ ਕਿ “ਜੇ ਪ੍ਰੈਸ ਕਾਰਡ ਵੀ ਡੁਪਲੀਕੇਟ ਬਣ ਸਕਦੇ ਹਨ, ਤਾਂ ਆਮ ਪਛਾਣ ਪ੍ਰਕਿਰਿਆ ‘ਤੇ ਭਰੋਸਾ ਕਿਵੇਂ ਕੀਤਾ ਜਾ ਸਕਦਾ ਹੈ?”
ਜਦੋਂ ਇਸ ਮਾਮਲੇ ਨੂੰ ਲੈ ਕੇ DPRO ਦਫਤਰ ਦੇ ਮੁਲਾਜ਼ਮਾਂ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਨੇ ਇਸ ਗੱਲ ਨੂੰ ਇੱਕ ਦੂਜੇ ਉੱਪਰ ਸੁੱਟਦੇ ਨਜ਼ਰ ਆਏ।
