ਜਲੰਧਰ (ਪੰਕਜ ਸੋਨੀ / ਨਰਿੰਦਰ ਗੁੱਪਤਾ ) ਸ਼ਹਿਰ ਦੇ ਬਸ ਸਟੈਂਡ ਤੋਂ ਲੈ ਕੇ ਕਈ ਹੋਰ ਹਿਸਿਆਂ ਤੱਕ ਕਾਲੇ ਧੰਧੇ ਦੀਆਂ ਗੂੰਜਾਂ ਤੇਜ਼ ਹੋ ਰਹੀਆਂ ਹਨ। ਜਾਣਕਾਰੀ ਅਨੁਸਾਰ, ਤੰਤ੍ਰਿਕਾ ਵੱਲੋਂ ਝਾੜ-ਫੂਕ, ਵਸ਼ੀਕਰਨ ਤੇ ਮਨਪਸੰਦ ਪ੍ਰੇਮੀ ਮਿਲਾਉਣ ਦੇ ਨਾਂ ’ਤੇ ਲੋਕਾਂ ਨਾਲ ਲੱਖਾਂ ਰੁਪਏ ਦੀ ਲੁੱਟ ਕੀਤੀ ਜਾ ਰਹੀ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਸ ਗ਼ੈਰਕਾਨੂੰਨੀ ਕਾਰੋਬਾਰ ਨੂੰ ਸ਼ਹਿਰ ਦੇ ਇੱਕ ਵਿਵਾਦਿਤ ਸ਼ਿਵ ਸੈਨਾ ਨੇਤਾ ਦਾ ਆਸ਼ੀਰਵਾਦ ਮਿਲ ਰਿਹਾ ਹੈ।
ਸੂਤਰਾਂ ਦਾ ਕਹਿਣਾ ਹੈ ਕਿ ਤੰਤ੍ਰਿਕਾ ਦੇ ਇਹ ਧੰਧੇ ਸਿਰਫ਼ ਬਸ ਸਟੈਂਡ ਤੱਕ ਹੀ ਸੀਮਿਤ ਨਹੀਂ, ਬਲਕਿ ਪੂਰੇ ਜਲੰਧਰ ਸ਼ਹਿਰ ਵਿੱਚ ਫੈਲੇ ਹੋਏ ਹਨ। ਲੋਕਾਂ ਦੀ ਮਾਨਸਿਕ ਕਮਜ਼ੋਰੀ ਦਾ ਫਾਇਦਾ ਚੁੱਕਦੇ ਹੋਏ ਇਹ ਗਿਰੋਹ ਉਹਨਾਂ ਦੀ ਜੇਬਾਂ ’ਤੇ ਡਾਕਾ ਮਾਰ ਰਿਹਾ ਹੈ।
ਸਭ ਤੋਂ ਵੱਡੀ ਚਿੰਤਾ ਦੀ ਗੱਲ ਇਹ ਹੈ ਕਿ ਜਲੰਧਰ ਪੁਲਿਸ ਨੂੰ ਇਸ ਮਾਮਲੇ ਦੀ ਪੂਰੀ ਜਾਣਕਾਰੀ ਹੋਣ ਦੇ ਬਾਵਜੂਦ ਵੀ ਇਹ ਕਾਲਾ ਖੇਡ ਬੇਝਿਜਕ ਚੱਲ ਰਿਹਾ ਹੈ। ਲੋਕਾਂ ਦਾ ਸਿੱਧਾ ਇਲਜ਼ਾਮ ਹੈ ਕਿ ਪੁਲਿਸ ਦੀ ਨਾਕ ਹੇਠ ਇਹ ਗੈਰਕਾਨੂੰਨੀ ਕਾਰਵਾਈ ਸੰਭਵ ਹੀ ਨਹੀਂ ਜਦੋਂ ਤੱਕ ਉੱਚ ਪੱਧਰ ਦੀ ਸਿਆਸੀ ਛਤਰੀ ਨਾ ਹੋਵੇ।
ਇਸ ਤੋਂ ਵੀ ਵੱਧ ਚੌਕਾਉਣ ਵਾਲੀ ਗੱਲ ਇਹ ਹੈ ਕਿ ਕਈ ਪੀੜਤ ਲੋਕ ਆਪਣੀ ਠੱਗੀ ਦੀ ਸ਼ਿਕਾਇਤ ਲੈ ਕੇ ਪੁਲਿਸ ਕੋਲ ਵੀ ਗਏ ਪਰ ਅੱਜ ਤੱਕ ਕੋਈ ਵੱਡੀ ਕਾਰਵਾਈ ਨਹੀਂ ਹੋਈ। ਇਸ ਕਾਰਨ ਲੋਕਾਂ ਵਿੱਚ ਪੁਲਿਸ ਪ੍ਰਸ਼ਾਸਨ ਨੂੰ ਲੈ ਕੇ ਗੰਭੀਰ ਸਵਾਲ ਖੜ੍ਹ ਰਹੇ ਹਨ।
ਲੋਕਾਂ ਦਾ ਕਹਿਣਾ ਹੈ ਕਿ ਧਾਰਮਿਕ ਭਾਵਨਾਵਾਂ ਨਾਲ ਖੇਡਦੇ ਹੋਏ ਜੇਕਰ ਇਸ ਧੰਧੇ ਨੂੰ ਰੋਕਿਆ ਨਾ ਗਿਆ ਤਾਂ ਇਹ ਸ਼ਹਿਰ ਵਿੱਚ ਧਰਮ ਤੇ ਕਾਨੂੰਨ ਦੋਹਾਂ ਲਈ ਵੱਡਾ ਖਤਰਾ ਬਣ ਸਕਦਾ ਹੈ। ਹੁਣ ਵੇਖਣਾ ਇਹ ਹੈ ਕਿ ਕੀ ਪੁਲਿਸ ਇਸ ਧੰਧੇ ਖ਼ਿਲਾਫ਼ ਕਾਰਵਾਈ ਕਰਦੀ ਹੈ ਜਾਂ ਫਿਰ ਸ਼ਿਵ ਸੈਨਾ ਨੇਤਾ ਦੇ ਆਸ਼ੀਰਵਾਦ ਨਾਲ ਇਹ ਖੇਡ ਹੋਰ ਵਧਦਾ ਹੈ।
