ਜੰਮੂ-ਕਸ਼ਮੀਰ ‘ਚ ਕੁਦਰਤ ਦਾ ਕਹਿਰ : ਮਾਤਾ ਵੈਸ਼ਣੋ ਦੇਵੀ ਯਾਤਰਾ ਮਾਰਗ ‘ਤੇ ਭੂ-ਸਖਲਨ, 32 ਸ਼ਰਧਾਲੂਆਂ ਦੀ ਮੌਤ, ਦਰਜਨਾਂ ਤੋਂ ਵੱਧ ਜ਼ਖ਼ਮੀ 11 ਸਾਲਾਂ ਬਾਅਦ ਸਭ ਤੋਂ ਵੱਡੀ ਤਬਾਹੀ
ਸਟਾਰ ਨਿਊਜ਼ ਨੈੱਟਵਰਕ (ਬਯੂਰੋ) : ਜੰਮੂ-ਕਸ਼ਮੀਰ ਵਿੱਚ ਮੌਸਮੀ ਤਬਾਹੀ ਨੇ ਹਾਹਾਕਾਰ ਮਚਾ ਦਿੱਤਾ ਹੈ। ਰਿਆਸੀ ਜ਼ਿਲ੍ਹੇ ‘ਚ ਮਾਤਾ ਵੈਸ਼ਣੋ ਦੇਵੀ ਧਾਮ ਵੱਲ ਜਾਣ ਵਾਲੇ ਰਸਤੇ ‘ਤੇ ਸੋਮਵਾਰ ਰਾਤ ਭਾਰੀ ਭੂ-ਸਖਲਨ ਹੋਇਆ। ਅੱਧ ਕੁੰਵਾਰੀ ਨੇੜੇ ਇੰਦ੍ਰਪ੍ਰਸਥ ਭੋਜਨਾਲੇ ਦੇ ਕੋਲ ਹੋਏ ਇਸ ਹਾਦਸੇ ਵਿੱਚ ਹੁਣ ਤੱਕ 32 ਸ਼ਰਧਾਲੂਆਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ 20 ਤੋਂ ਵੱਧ ਲੋਕ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹਨ। ਪ੍ਰਸ਼ਾਸਨ ਨੂੰ ਅੰਦਾਜ਼ਾ ਹੈ ਕਿ ਹੋਰ ਵੀ ਲੋਕ ਮਲਬੇ ਹੇਠ ਦੱਬੇ ਹੋ ਸਕਦੇ ਹਨ। ਫੌਜ ਅਤੇ ਐਨ.ਡੀ.ਆਰ.ਐਫ ਦੀਆਂ ਟੀਮਾਂ ਰਾਹਤ ਅਤੇ ਬਚਾਵ ਕਾਰਜਾਂ ‘ਚ ਜੁੱਟੀਆਂ ਹਨ।
ਮੀਂਹ ਕਾਰਨ ਹਾਲਤ ਬੇਕਾਬੂ
ਪਿਛਲੇ ਚਾਰ ਦਿਨਾਂ ਤੋਂ ਹੋ ਰਹੀ ਲਗਾਤਾਰ ਬਾਰਿਸ਼ ਨੇ ਜੰਮੂ ਸੰਭਾਗ ਦੇ ਕਰੀਬ ਸਾਰੇ ਜ਼ਿਲ੍ਹੇ ਪ੍ਰਭਾਵਿਤ ਕੀਤੇ ਹਨ। ਸਭ ਵੱਡੀਆਂ ਦਰਿਆਵਾਂ ਖਤਰੇ ਦੇ ਨਿਸ਼ਾਨ ਤੋਂ ਉੱਪਰ ਵਗ ਰਹੀਆਂ ਹਨ। 2014 ਦੀ ਹੜ੍ਹ ਤੋਂ ਬਾਅਦ 11 ਸਾਲ ‘ਚ ਪਹਿਲੀ ਵਾਰ ਇੰਨੀ ਵੱਡੀ ਤਬਾਹੀ ਵੇਖੀ ਗਈ ਹੈ। ਸੈਂਕੜੇ ਪਰਿਵਾਰਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ ਗਿਆ ਹੈ। ਕਈ ਪੁਲਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਬਿਜਲੀ ਅਤੇ ਟੈਲੀਕਮ ਸੇਵਾਵਾਂ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੋਈਆਂ ਹਨ।
ਆਵਾਜਾਈ ਠੱਪ
ਭਾਰੀ ਭੂ-ਸਖਲਨਾਂ ਕਾਰਨ ਜੰਮੂ-ਸ਼੍ਰੀਨਗਰ ਰਾਸ਼ਟਰੀ ਰਾਜਮਾਰਗ 12 ਥਾਵਾਂ ‘ਤੇ ਬੰਦ ਹੋ ਗਿਆ ਹੈ। ਜੰਮੂ, ਉਧਮਪੁਰ ਅਤੇ ਕਟੜਾ ਆਉਣ-ਜਾਣ ਵਾਲੀਆਂ 18 ਟ੍ਰੇਨਾਂ ਰੱਦ ਕੀਤੀਆਂ ਗਈਆਂ ਹਨ। ਦੋ ਹਵਾਈ ਉਡਾਣਾਂ ਵੀ ਰੱਦ ਕੀਤੀਆਂ ਗਈਆਂ ਹਨ। ਤਵੀ ਦਰਿਆ ‘ਤੇ ਬਣੇ ਪੁਲਾਂ ਨੂੰ ਹਿੱਸੇਵਾਰ ਤੌਰ ‘ਤੇ ਬੰਦ ਕਰਨਾ ਪਿਆ ਹੈ। ਕਿਸ਼ਤਵਾਰ ‘ਚ ਚਿਨਾਬ ਦਰਿਆ ਦਾ ਪਾਣੀ ਖਤਰਨਾਕ ਪੱਧਰ ‘ਤੇ ਪਹੁੰਚ ਗਿਆ ਹੈ। ਦ੍ਰਾਬਸ਼ਾਲਾ ਰਤਲੇ ਪਾਵਰ ਪ੍ਰੋਜੈਕਟ ਨੇੜੇ ਲੋਹੇ ਦਾ ਪੁਲ ਵਹਿ ਗਿਆ ਹੈ।
ਕਈ ਰਸਤੇ ਬੰਦ
ਰਾਮਨਗਰ, ਚਿਨੈਨੀ, ਪੰਛੈਰੀ, ਮਜਾਲਤਾ ਸਮੇਤ ਕਈ ਇਲਾਕਿਆਂ ਵਿਚ ਭੂ-ਸਖਲਨ ਅਤੇ ਪੱਥਰ ਡਿਗਣ ਨਾਲ ਲਿੰਕ ਰਸਤੇ ਬੰਦ ਹਨ। ਸੰਬਾ, ਭਦਰਵਾਹ ਅਤੇ ਵਿਜੈਪੁਰ ਖੇਤਰਾਂ ਵਿੱਚ ਵੀ ਸੜਕਾਂ ਨੂੰ ਵੱਡਾ ਨੁਕਸਾਨ ਪਹੁੰਚਿਆ ਹੈ। ਮੌਸਮ ਵਿਭਾਗ ਨੇ ਅਗਲੇ 24 ਘੰਟਿਆਂ ਲਈ ਭਾਰੀ ਬਾਰਿਸ਼ ਦਾ ਅਲਰਟ ਜਾਰੀ ਕੀਤਾ ਹੈ। ਸਰਕਾਰ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਬਿਨਾਂ ਲੋੜ ਦੇ ਯਾਤਰਾ ਨਾ ਕਰਨ ਅਤੇ ਸੁਰੱਖਿਅਤ ਥਾਵਾਂ ‘ਤੇ ਰਹਿਣ।
