ਬਾਰਸ਼ ਨੇ ਦਿਖਾਇਆ ਨਗਰ ਨਿਗਮ ਦਾ ਸੱਚ — DC ਨੂੰ ਕਰਨਾ ਪਿਆ ਛੁੱਟੀ ਦਾ ਹੁਕਮ !
ਜਲੰਧਰ (ਪੰਕਜ ਸੋਨੀ) ਸ਼ਹਿਰ ‘ਚ ਬਾਰਸ਼ ਨੇ ਇੱਕ ਵਾਰੀ ਫਿਰ ਨਗਰ ਨਿਗਮ ਦੀ ਅਸਲੀਅਤ ਬੇਨਕਾਬ ਕਰ ਦਿੱਤੀ ਹੈ। ਕੁਝ ਘੰਟਿਆਂ ਦੀ ਬਾਰਸ਼ ਨਾਲ ਸ਼ਹਿਰ ਦੀਆਂ ਗਲੀਆਂ, ਮੁੱਖ ਸੜਕਾਂ ਅਤੇ ਚੌਂਕ ਪਾਣੀ ਵਿੱਚ ਡੁੱਬ ਗਏ। ਲੋਕਾਂ ਦਾ ਸਾਫ਼ ਕਹਿਣਾ ਹੈ ਕਿ ਇਹ ਹਾਲਾਤ ਨਾ ਕਿਸੇ ਹੜ੍ਹ ਕਾਰਨ ਹਨ ਤੇ ਨਾ ਹੀ ਕਿਸੇ ਤੂਫ਼ਾਨ ਕਰਕੇ—ਇਹ ਸਿਰਫ਼ ਤੇ ਸਿਰਫ਼ ਨਗਰ ਨਿਗਮ ਦੀ ਨਾਕਾਮੀ ਦਾ ਨਤੀਜਾ ਹੈ।
ਜਲੰਧਰ ਦੇ ਹਾਲਾਤ ਐਵੇਂ ਬਣ ਗਏ ਜਿਵੇਂ ਪੂਰਾ ਸ਼ਹਿਰ ਪਾਣੀ ਦੇ ਅੰਦਰ ਆ ਗਿਆ ਹੋਵੇ। ਪਾਣੀ ਇੰਨਾ ਵੱਧ ਗਿਆ ਕਿ ਜ਼ਿੰਦਗੀ ਠੱਪ ਹੋ ਗਈ। ਬਾਰਸ਼ ਨੇ ਖੁਦ ਜਲੰਧਰ ਦੇ ਡਿਪਟੀ ਕਮਿਸ਼ਨਰ ਨੂੰ ਮਜਬੂਰ ਕਰ ਦਿੱਤਾ ਕਿ ਉਹ ਸਕੂਲਾਂ ਵਿੱਚ ਸਰਕਾਰੀ ਛੁੱਟੀ ਦਾ ਐਲਾਨ ਕਰਨ। ਇਹੋ ਜਿਹੀ ਨਾਕਾਮੀ ਪਹਿਲਾਂ ਕਦੇ ਸਾਹਮਣੇ ਨਹੀਂ ਆਈ ਕਿ ਸਿਰਫ਼ ਬਾਰਸ਼ ਨਾਲ ਬੱਚਿਆਂ ਦੀ ਪੜ੍ਹਾਈ ਰੁਕ ਜਾਵੇ।
ਲੋਕਾਂ ਦੇ ਸਵਾਲ ਗੰਭੀਰ ਹਨ—ਕੀ ਬੱਚਿਆਂ ਦੀ ਪੜ੍ਹਾਈ ਹਰ ਬਾਰਸ਼ ਨਾਲ ਰੁਕਦੀ ਰਹੇਗੀ? ਕੀ ਇਹੋ ਜਿਹਾ ਜਲੰਧਰ “ਸਮਾਰਟ ਸਿਟੀ” ਕਹਾਉਣ ਦੇ ਯੋਗ ਹੈ? ਜਿੱਥੇ ਲੋਕਾਂ ਨੂੰ ਹੜ੍ਹ ਵਰਗੇ ਹਾਲਾਤਾਂ ‘ਚ ਗਲੀਆਂ ਵਿੱਚੋਂ ਪਾਣੀ ਵਿੱਚ ਤੈਰ ਕੇ ਲੰਘਣਾ ਪਏ?
ਪਿਛਲੀਆਂ ਸਰਕਾਰਾਂ ਤੋਂ ਲੈ ਕੇ ਮੌਜੂਦਾ ਸਰਕਾਰ ਤੱਕ ਹਰ ਵਾਰ ਵਾਅਦੇ ਕੀਤੇ ਗਏ ਕਿ ਨਗਰ ਨਿਗਮ ਦੇ ਹਾਲਾਤ ਸੁਧਾਰੇ ਜਾਣਗੇ, ਪਾਣੀ ਨਿਕਾਸ ਲਈ ਨਵੇਂ ਪ੍ਰਾਜੈਕਟ ਲਗਾਏ ਜਾਣਗੇ, ਪਰ ਹਕੀਕਤ ਹਮੇਸ਼ਾਂ ਵਾਅਦਿਆਂ ਤੋਂ ਉਲਟ ਰਹੀ ਹੈ।
ਅੱਜ ਜਲੰਧਰ ਦੀਆਂ ਗਲੀਆਂ ‘ਚ ਵਗਦਾ ਪਾਣੀ ਸਰਕਾਰ ਅਤੇ ਨਗਰ ਨਿਗਮ ਦੀ ਬੇਧਿਆਨੀ ਦੀ ਜੀਵੰਤ ਤਸਵੀਰ ਪੇਸ਼ ਕਰ ਰਿਹਾ ਹੈ। ਲੋਕਾਂ ਦੀਆਂ ਗੱਡੀਆਂ ਖਰਾਬ ਹੋ ਰਹੀਆਂ ਹਨ, ਘਰਾਂ ਅਤੇ ਦੁਕਾਨਾਂ ਵਿੱਚ ਪਾਣੀ ਵੜ ਗਿਆ ਹੈ, ਬੱਚੇ ਸਕੂਲ ਨਹੀਂ ਜਾ ਸਕਦੇ। ਲੋਕ ਪੁੱਛ ਰਹੇ ਹਨ—ਜਦੋਂ ਨਾ ਹੜ੍ਹ ਆਇਆ, ਨਾ ਕੋਈ ਕੁਦਰਤੀ ਆਫ਼ਤ, ਤਾਂ ਫਿਰ ਹਰ ਬਾਰਸ਼ ਨਾਲ ਜਲੰਧਰ ਡੁੱਬ ਕਿਉਂ ਜਾਂਦਾ ਹੈ? ਕੀ ਇਹ ਸ਼ਹਿਰ ਦੀ ਸਭ ਤੋਂ ਵੱਡੀ ਨਾਕਾਮੀ ਨਹੀਂ?
