ਜਲੰਧਰ (ਪੰਕਜ ਸੋਨੀ) – ਪੰਜਾਬ ਇਸ ਵੇਲੇ ਹੜ੍ਹਾਂ ਦੀ ਭਾਰੀ ਤਬਾਹੀ ਦਾ ਸਾਹਮਣਾ ਕਰ ਰਿਹਾ ਹੈ। ਤਾਜ਼ਾ ਅੰਕੜਿਆਂ ਮੁਤਾਬਕ, ਸੂਬੇ ਦੇ 10 ਜ਼ਿਲ੍ਹਿਆਂ ਦੇ 1018 ਪਿੰਡ ਹੜ੍ਹਾਂ ਨਾਲ ਪ੍ਰਭਾਵਿਤ ਹਨ, ਜਦਕਿ ਲਗਭਗ ਤਿੰਨ ਲੱਖ ਏਕੜ ਖੇਤੀਬਾੜੀ ਜ਼ਮੀਨ ਪਾਣੀ ਹੇਠ ਆ ਗਈ ਹੈ। ਨਾ ਸਿਰਫ਼ ਖੜ੍ਹੀ ਫਸਲਾਂ ਤਬਾਹ ਹੋਈਆਂ ਹਨ, ਸਗੋਂ ਪਸ਼ੂ–ਧਨ ਨੂੰ ਵੀ ਭਾਰੀ ਨੁਕਸਾਨ ਪਹੁੰਚਿਆ ਹੈ।
ਰਾਹਤ ਤੇ ਬਚਾਅ ਕਾਰਜ
ਫੌਜ, ਐਨਡੀਆਰਐਫ, ਐਸਡੀਆਰਐਫ ਅਤੇ ਪੰਜਾਬ ਪੁਲਿਸ ਨੇ ਹਾਲਾਤਾਂ ‘ਤੇ ਕਾਬੂ ਪਾਉਣ ਲਈ ਮੋਰਚਾ ਸੰਭਾਲ ਲਿਆ ਹੈ। ਪਿਛਲੇ 24 ਘੰਟਿਆਂ ਵਿੱਚ 4711 ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ ਗਿਆ ਹੈ। ਇਨ੍ਹਾਂ ਵਿੱਚ ਗੁਰਦਾਸਪੁਰ ਤੋਂ 2571, ਫਿਰੋਜ਼ਪੁਰ ਤੋਂ 812, ਫਾਜ਼ਿਲਕਾ ਤੋਂ 1239, ਬਰਨਾਲਾ ਤੋਂ 25 ਅਤੇ ਮੋਗਾ ਤੋਂ 4 ਲੋਕ ਸ਼ਾਮਲ ਹਨ।
ਇਸ ਵੇਲੇ ਸੂਬੇ ਭਰ ਵਿੱਚ 87 ਰਾਹਤ ਕੈਂਪਾਂ ਵਿੱਚੋਂ 77 ਪੂਰੀ ਤਰ੍ਹਾਂ ਸਰਗਰਮ ਹਨ ਜਿੱਥੇ ਲਗਭਗ 4729 ਲੋਕ ਰਹਿ ਰਹੇ ਹਨ।
ਐਨਡੀਆਰਐਫ ਦੀਆਂ ਸੱਤ ਟੀਮਾਂ ਗੁਰਦਾਸਪੁਰ ਵਿੱਚ, ਦੋ ਪਠਾਨਕੋਟ ਵਿੱਚ, ਜਦਕਿ ਇੱਕ-ਇੱਕ ਟੀਮ ਫਿਰੋਜ਼ਪੁਰ ਅਤੇ ਫਾਜ਼ਿਲਕਾ ਵਿੱਚ ਕੰਮ ਕਰ ਰਹੀ ਹੈ। ਐਸਡੀਆਰਐਫ ਦੀਆਂ ਦੋ ਟੀਮਾਂ ਕਪੂਰਥਲਾ ਵਿੱਚ ਤੈਨਾਤ ਹਨ। ਫੌਜ, ਬੀਐਸਐਫ ਅਤੇ ਹਵਾਈ ਸੈਨਾ ਨੇ ਕਪੂਰਥਲਾ, ਗੁਰਦਾਸਪੁਰ, ਫਿਰੋਜ਼ਪੁਰ ਅਤੇ ਪਠਾਨਕੋਟ ਵਿੱਚ ਚਾਰਜ ਸੰਭਾਲਿਆ ਹੋਇਆ ਹੈ।
ਮੌਸਮ ਵਿਭਾਗ ਦੀ ਨਵੀਂ ਚੇਤਾਵਨੀ
ਮੌਸਮ ਵਿਭਾਗ ਨੇ ਹੁਣ ਮੀਂਹ ਦੀ ਚੇਤਾਵਨੀ ਨੂੰ ਸਵੇਰੇ 11:45 ਵਜੇ ਤੱਕ ਵਧਾ ਦਿੱਤਾ ਹੈ। ਇਸ ਦੌਰਾਨ ਪੰਜਾਬ ਦੇ ਕਈ ਇਲਾਕਿਆਂ ਵਿੱਚ ਹਲਕੀ ਤੋਂ ਭਾਰੀ ਬਾਰਿਸ਼ ਹੋ ਸਕਦੀ ਹੈ।
ਪੰਜਾਬ ਸਰਕਾਰ ਨੇ ਹਾਲਾਤਾਂ ਨੂੰ ਵੇਖਦੇ ਹੋਏ ਚਾਰ ਦਿਨਾਂ ਲਈ ਸਕੂਲ ਬੰਦ ਕੀਤੇ ਸਨ। ਸੋਮਵਾਰ ਤੋਂ ਸਕੂਲ ਖੁੱਲਣ ਦੀ ਸੰਭਾਵਨਾ ਹੈ, ਪਰ ਸਰਕਾਰ ਵੱਲੋਂ ਹਾਲਾਤਾਂ ਦੇ ਮੁਤਾਬਕ ਅੰਤਿਮ ਫੈਸਲਾ ਲਿਆ ਜਾਵੇਗਾ।
ਸਭ ਤੋਂ ਵੱਧ ਪ੍ਰਭਾਵਿਤ ਜ਼ਿਲ੍ਹੇ
ਪਠਾਨਕੋਟ ਸਭ ਤੋਂ ਵੱਧ ਪ੍ਰਭਾਵਿਤ ਜ਼ਿਲ੍ਹਾ ਸਾਹਮਣੇ ਆ ਰਿਹਾ ਹੈ ਜਿੱਥੇ 81 ਪਿੰਡ ਹੜ੍ਹਾਂ ਦੀ ਲਪੇਟ ਵਿੱਚ ਹਨ। ਇਸ ਤੋਂ ਇਲਾਵਾ –
ਫਾਜ਼ਿਲਕਾ ਦੇ 52 ਪਿੰਡ
ਤਰਨਤਾਰਨ ਦੇ 45 ਪਿੰਡ
ਸ੍ਰੀ ਮੁਕਤਸਰ ਸਾਹਿਬ ਦੇ 64 ਪਿੰਡ
ਸੰਗਰੂਰ ਦੇ 22 ਪਿੰਡ
ਫਿਰੋਜ਼ਪੁਰ ਦੇ 101 ਪਿੰਡ
ਕਪੂਰਥਲਾ ਦੇ 107 ਪਿੰਡ
ਗੁਰਦਾਸਪੁਰ ਦੇ 323 ਪਿੰਡ
ਹੁਸ਼ਿਆਰਪੁਰ ਦੇ 85 ਪਿੰਡ
ਮੋਗਾ ਦੇ 35 ਪਿੰਡ
ਖੇਤੀਬਾੜੀ ਨੂੰ ਵੱਡਾ ਝਟਕਾ
ਹੜ੍ਹਾਂ ਕਾਰਨ ਖੇਤੀਬਾੜੀ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਫਾਜ਼ਿਲਕਾ ਜ਼ਿਲ੍ਹੇ ਵਿੱਚ 16,632 ਹੈਕਟੇਅਰ, ਫਿਰੋਜ਼ਪੁਰ ਵਿੱਚ 10,806 ਹੈਕਟੇਅਰ, ਕਪੂਰਥਲਾ ਵਿੱਚ 11,620 ਹੈਕਟੇਅਰ, ਪਠਾਨਕੋਟ ਵਿੱਚ 7,000 ਹੈਕਟੇਅਰ, ਤਰਨਤਾਰਨ ਵਿੱਚ 9928 ਹੈਕਟੇਅਰ ਅਤੇ ਹੁਸ਼ਿਆਰਪੁਰ ਵਿੱਚ 5287 ਹੈਕਟੇਅਰ ਰਕਬੇ ਦੀ ਫਸਲ ਪਾਣੀ ਹੇਠ ਆ ਗਈ ਹੈ।
